धनकुटा । यस मौसमको अविरल बर्षाको कारण पहिरोमा परी पूर्ण रुपमा क्षति भएको ४१ घर पुनर्निर्माणका लागि सिफारिस भएको छ । जिल्ला विपत व्यवस्थापन समितिकोे बैठकले जिल्लाभरीबाट निवेदन आएकामध्ये प्रक्रिया पुगेकाहरु पहिलो चरणमा सिफारिस गर्ने निर्णय गरेको छ ।
यसका साथै सो बैठकले एक जना मृतक परिवारलाई राहतका लागि सिफारिस गर्ने निर्णय भएको प्रमुख जिल्ला अधिकारी केशवप्रसाद विमलीले जानकारी दिए । बैठकले छुट भएका पूर्ण रुपमा घर क्षति भएका पीडितहरुको प्रक्रिया पु¥याई सिफारिस गर्ने निर्णय गरेका छन् ।
सो बैठकलाई प्रतिनिधि सभाका सदस्य सांसद राजेन्द्रकुमार राईले विपतमा परी पीडित भएकाहरुलाई निष्पक्ष ढंगबाट राहत उपलब्ध गराउनु पर्ने बताए ।
सो अवसरमा अमेरिका रेडक्रस सोसाईटीको आर्थिक सहयोगमा सोसाईटी धनकुटा शाखाद्वारा प्रकाशित जिल्ला विपत पूर्वतयारी तथा प्रतिकार्य योजना २०७७ नामक पुस्तकको प्रतिनिधि सभाका सांसद राजेन्द्रकुमार राई, प्रदेशसभाका सांसदहरु इन्द्रमणी पराजुली, निरन राईले संयुक्त रुपमा विमोचन गरेका थिए ।
सो अवसरमा १ नम्वर प्रदेश सभाका सांसद कुसुम कुमारी श्रेष्ठ, जिल्ला समन्वय समितिका प्रमुख टंक चुवान, धनकुटा नगरपालिकाका प्रमुख चिन्तन तामाङ, महालक्ष्मी नरपालिकाका प्रमुख पर्शुराम नेपाल, उपप्रमुख मञ्जु अधिकारी, पाख्रिवास नगरउपप्रमुख देवकला तिम्सिना, गाउँपालिकाका अध्यक्षहरु क्रमशः सहिदभूमी मनोज राई, छथरजोरपाटीका शेरबहादुर राई, चौविसेका खजिन्द्र राईलगायतले बास्तविक पीडितहरुलाई जसरी भए पनि राहत उपलब्ध गराउनु पर्नेमा जोड दिएका थिए ।
समितिका संयोजक तथा प्रजिअ केशवप्रसाद विमलीको अध्यक्षतमा बैठक सम्पन्न भएको थियो । बैठकमा सहायक प्रमुख जिल्ला अधिकारी भोजराज श्रेष्ठ, धनकुटा जिल्ला विपत व्यवस्थापन उपसमितिका सदस्यहरु नेपाल रेडक्रस सोसाईटीका जिल्ला अध्यक्ष हरिकुमार राई, धनकुटा उद्योग बाणिज्य संघका अध्यक्ष विजय सन्तोषी राई, नेपाल पत्रकार महासंघका अध्यक्ष राजेश्वरबहादुर श्रेष्ठलगायतले बाढी पहिरो क्षति पु¥याई विपतमा परेका परिवारहरुको विवरण प्रस्तुत गरेका थिए ।
बैठकमा वरख गण सल्लेरी ब्यारेकका गणपति कर्णेल भगवान थापा, जिल्ला प्रहरी कार्यालयका एसपी गोविन्द अधिकारी, सशस्त्र प्रहरी बल ६ नम्वर गुल्म छिन्ताङ्गका गुल्मपति डिएसपी रामचन्द्र श्रेष्ठ, राष्ट्रिय अनुसन्धानका प्रमुख तुलसी कटेललगायत विभिन्न कार्यालयका प्रमुखहरुले सुझाव दिएका थिए ।
विपतमा परी पूर्ण रुपमा क्षति भई पीडित भएकाहरुलाई जिल्ला प्रशासन कार्यालयले राहत स्वरुप तत्कालका लागी परिवार सख्या हेरेर १५ हजारदेखि २० हजार रुपैयासम्म वितरण गरेका थिए । यस्तै वाणिज्य संघले खाद्यान्नहरु र रेडक्रस सोसाईटीले लत्ता कपडा, भाडा वर्तनहरु, त्रिपालहरु प्रदान गरेको समितिका सदस्य तथा रेडक्रस सोसाईटीका अध्यक्ष हरिकुमार राईले जानकारी दिए ।
सो अवसरमा जिल्ला आयोजना कार्यान्वयन इकाई (शिक्षा) का शम्भुप्रसाद पाण्डेले प्रस्तुत गरेका जिल्लाका ७ वटा विद्यालय पुनर्निर्माणका लागि सूचिमा दर्ता गर्ने निर्णय गरिएको थियो ।