धनकुटा २९ असोज । नेपाल रेडक्रस सोसाईटीको समन्वयमा स्थानीय सात संस्थाहरुले सञ्चालन गरेको तपाईको मास्क खै ? अभियान शुरु भएको छ । अभियानको प्रारम्भ हिलेबजारस्थित बिहीवारे हटियाबाट शुरु भएको रेडक्रस सोसाईटीका अध्यक्ष हरिकुमार राईले जानकारी दिए ।
अध्यक्ष राईले अहिले विश्वमै महामारीको रुप लिईरहेको कोरोना भाईरस (कोभिड –१९) को संक्रमण धनकुटामा पनि समुदायस्तरमा फैलिरहेको जानकारी दिए । उनले यसबाट बच्ने एकमात्र उपाय भनेको आफु सुरक्षित रहने भएकाले अरुबाट र अरुलाई संक्रमण नसरोस् भनेर मास्क अनिवार्य लगाउनु पर्ने भएकाले अभियान शुरु गरेको बताए ।
सो अभियानमा रेडक्रस सोसाईटीका साथै नेपाल प्रहरी, सशस्त्र प्रहरी बल छिन्ताङ गुल्म, धनकुटा बहुमुखी क्याम्पस, धनकुटा लेडिज जेसिज, कृषि पर्यटन प्रवद्र्धनमा महिला अभियान, महिला शिक्षक समाज संस्थाहरु सहभागी छन् ।
हिलेमा आयोजित अभियानमा हटिया भर्न मास्क नलगाई आएकाहरुलाई मास्क वितरण गरिएको थियो । सो अवसरमा मास्कको प्रयोग किन आवश्यक छ भन्न वारेमा सचेतना जगाउने कार्य समेत गरिएको लेडि जेसिजका अध्यक्ष रविना श्रेष्ठले जानकारी दिए ।
सो कार्यक्रममा जिल्ला प्रहरी कार्यालयका प्रवक्ता डिएसपी ध्रुवकुमार श्रेष्ठ, वडा नं. १ का वडाध्यक्ष निरेन तामाङलगायत हिलेका स्थानीय समाजसेवीहरुको सहभागी रहेको थियो ।
कार्यक्रम आयोजनाका लागि दुइृदिन अघि सोसाईटीका अध्यक्ष राईको अध्यक्षतामा छलफल कार्यक्रम आयोजना गरिएको थियो । सो कार्यक्रममा अध्यक्ष राईले कोभिड–१९ नियन्त्रणका लागि मास्कको आवश्यकताका वारेमा जानकारी दिएका थिए ।
सो कार्यक्रममा नेपाल पत्रकार महासंघका अध्यक्ष राजेश्वरबहादुर श्रेष्ठ, कृषि पर्यटन प्रवद्र्धनमा महिला अभियानका अध्यक्ष तारा तितुङ, लेडि जेसिजका अध्यक्ष रविना श्रेष्ठले कोरोना भाईरसको संक्रमण समुदायस्तरमा फैलिरहेकोले नियन्त्रणका लागि मास्कको अनिवार्यताका वारेमा सचेतना जगाउनु पर्ने बताए ।
अभियान जिल्लाका अन्य ग्रामीण बजारहरुमा पनि दशै पछि सञ्चालन गरिने अभियानकर्ता तारा तितुङले जानकारी दिए ।