धनकुटा कार्तिक २१ । महालक्ष्मी नगरपालिकाले कोभिड –१९ बाट संक्रमितको स्वास्थ्य उपचारका लागि आर्थिक सहयोग दिने निर्णय गरेको छ । नगरपालिकाले भाईरसको कारण स्वास्थ्य अवस्था गंभीर भई आईसीयूमा भर्ना भई उपचार गर्दा लाग्ने खर्चमा सहयोग पुगोस् भनेर अधिकतम २५ हजारसम्म आर्थिक सहयोग गर्ने निर्णय भएको नगरप्रमुख पर्शुराम नेपालले जानकारी दिए ।
अहिले जिल्लामा पनि कोरोना भाईरसको संक्रमण समुदायस्तरमा फैलिदै गएको छ । सरकारले उपचार गर्न नसक्ने भएपछि उपचार खर्च व्यक्तिगत रुपमा गर्नुपर्ने अवस्था छ । आइसीयूमा राखेर गरिने उपचार पनि महङ्गो भएका केहि राहत होस् भनेर सहयोग गर्ने निर्णय गरिएको प्रमुख नेपालले जानकारी दिए । उनले धनकुटाका अस्पतालमा आईसीयू नभएको कारण आईसीयूमा उपचार गर्नुपर्ने बिरामीहरुलाई धरान वा विराटनगरका अस्पतालमा पु¥याउनु पर्ने अवस्था छ । आईसीयूको उपचार खर्चिलो हुने भएकाले नगरवासीको ज्यान बचाउनका लागि केही मात्रामा सहयोग पुग्ने विश्वास लिएको प्रमुख नेपालले बताए ।
त्यस्तै नगरपालिकाले लक्षणसहितका नगरवासीको पीसीआर परीक्षण गर्दा लाग्ने शुल्कमा ५० प्रतिसत रकम दिने निर्णय गरेको प्रमुख कार्यकारी अधिकृत सूर्य सुवेदीले जानकारी दिए । धनकुटामा पीसीआर मेशिन आउने हल्ला चलेको महिनौ भइसकेको छ । तर, अहिले धनकुटामा सर्वसाधारण पीसीआर परीक्षणका लागि धरान जानु पर्ने अवस्था पनि आएको छ । समूहमा आए वा आइसोलेशन सेन्टरमा उपचारत विरामीको स्वाव संकलन गरेर धरान पठाईन्छ ।
पहिले निःशुल्क रुपमा हुने परीक्षण सरकारले गर्न छाडेसँगै सम्भावित संक्रमितहरु रकम अभावले परीक्षण गर्न छाडेको अवस्था छ । यसले संक्रमण झन व्यापक रुपमा समुदायस्तरमा फैलिने भयको कारण धनकुटा जिल्लास्तरीय कोभिड –१९ जोखिम व्यवस्थापन सेन्टरको बैठकले जिल्लाका सबै स्थानीय तहहरुले ५० प्रतिसत रकम सहयोग गर्ने निर्णय गरेको थियो ।
यसका साथै पीसीआर परीक्षणका लागि स्वाव संकलन किट (भीटीएम) र ल्याबसम्म स्वाब पु¥याउँदा लाग्ने ढुवानी खर्च पनि सम्बन्धित स्थानीय तहले नै व्यवस्था गर्ने सहमती भएको छ । नगरपालिकाले संक्रमण पुष्टि भएका संक्रमितलाई अस्पताल लैजान एम्बुलेन्स निःशुल्क उपलब्ध गराउँने र संक्रमितको मृत्यु भएमा शव वाहन खर्चसमेत नगरपालिकाले नै व्येहोर्ने प्रमुख नेपालले जानकारी दिए । उनका अनुसार धनकुटामा वबाहन नभएकाले नयाँ शवबाहन खरिदका लागि सबै स्थानीय तहहरुले सहयोग गर्ने निर्णय भएको जानकारी दिए ।
कोरोना संक्रमितको उपचारमा केन्द्र सरकार पछि हटेका बेला स्थानीय सरकारले नगरवासीलाई संकटमा साथ दिने निर्णय लिएकोमा स्थानीय जेवी घलेले प्रशंसा गरे । उनले यस्ता जनमुखी कार्यले आमजनतामा गाउँमा सरकार छ भन्ने अनुभूति हुने बताए ।