धनकुटा कार्तिक २१ । त्रिशुले–राम बजार सडक कालोपत्रे गरिने भएको छ । छथर जोरपाटी गाउँपालिकाको त्रिशुलेदेखि महालक्ष्मी नगरपालिकाको केन्द्र जीतपुर बजार हुँदै रामबजार जोड्ने ३३ किलोमिटर सडक कालोपत्रे गरिने भएको हो ।
संघीय मामिला तथा स्थानीय बिकास मन्त्रालयको स्थानीय पूर्वाधार बिभाग ग्रामीण सडक सञ्जाल सुधार आयोजना (आरसीआईपी.) अन्र्तगत सो सडक स्तरोन्नती गर्न लागिएको हो । सडक चौडा गरी कालोपत्रे गर्न अहिले प्रारम्भिक अध्ययन भईरहेको महालक्ष्मी नगरपालिकाका प्रमुख पर्शुराम नेपालले जानकारी दिए । प्रमुख नेपालले ‘सबै प्रक्रिया पुरा गरेर कालोपत्रेको काम थाल्न एक बर्ष भन्दा बढी समय लाग्नसक्ने जानकारी दिए ।’
अहिले सो सडक ग्राभेल अवस्थामा छ । त्रिशुलेदेखि आन्द्रुङ जिरोप्वाईन्टसम्मको सडक ५ मिटर चौडा छभने त्यहाँदेखि राम बजारसम्मको सडक ६ मिटर चौडा बनाईएको छ । अब, पुरै सडक खण्ड ७ मिटर चौडा हुने प्रमुख नेपालले बताए । उनकाअनुसार सडक चौडा गर्दा प्रभावित हुनेहरुसँग अहिले छलफल र सहमति जुटाउँने काम भईरहेको छ । आज शुक्रबार पनि सोही बिषयमा महालक्ष्मी नगरपालिकाको भन्ज्यांङमा छलफल कार्यक्रम गरिएको जानकारी दिए ।
यता, छथर जोरपाटी गाउँपालिकाले पनि यो बिषयमा प्रभावितहरुसँग छलफल गरिसकेको छ । प्रारम्भिक छलफलमा सडकको सीमा रेखाङ्कन गर्ने र सडक सिमानामा रहेका निजी तथा सार्वजनिक घर टहरा हटाउने सहमति जुटेको गाउँपालिका अध्यक्ष शेरबहादुर लिम्बूले बताए । उनले प्रारम्भिक प्रतिवेदनपछि सडक कालोपत्रेका लागि बिभागबाट पूर्ण सर्भेक्षणसहित अन्य प्रक्रिया सुरु हुने बताए ।
सो सडक खण्ड अन्र्तगत छथरजोरपाटी क्षेत्रमा १३ किलोमिटर र महालक्ष्मी क्षेत्रमा २० किलोमिटर सडक पर्छ । सो सडक यसअघि नै ग्राभेल भईसकेको भएपनि बर्खाको मौसममा हिलाम्मे भएर सवारी साधन आवतजावतमा समस्या हुँने गरेको छ । अहिले सडक कालोपत्रेका लागि अध्ययन थालिएपछि सो क्षेत्रवासी उत्साहित बनेका छन् । सो सडक कालोपत्रे हुँदा छथर जोरपाटी गाउँपालिकाको हात्तिखर्क, महालक्ष्मी नगरपालिकाको अर्खौले जीतपुर, लेगुवा लगायत क्षेत्रका ५ हजार भन्दा बढी घरधुरी लाभान्वित हुँनेछन् ।
सो सडक निर्माण भएपछि छिमेक िजिल्ला भोजपुर जाने बैकल्पिक मार्गका रुपमा पनि विकास हुने छ ।
