धनकुटा २३ मंसिर । धनकुटा जिल्ला विपत व्यवस्थापन समितिको आज सम्पन्न बैठकले गत बर्षामा क्षति भएका ६४ वटा घर पुनर्निर्माणका लागी सिफारिस गर्ने निर्णयहरु गरेको छ । सो बर्षाको कारण पूर्ण रुपमा घर क्षति भएकाहरुको प्राप्त निवेदनहरु माथी छानविन गरी सो सिफारिस गर्ने निर्णय गरिएको समितिका संयोजक प्रमुख जिल्ला अधिकारी केशव प्रसाद विमलीले जानकारी दिए । सो बैठकले बर्षाको कारण मृत्यू भएका मृतक परिवारलाई राहत दिने निर्णय समेत भएको जानकारी दिए ।
यस्तै सो बैठकले जोखिममा रहेको वस्ती स्थानान्तरण गर्नसमेत सिफारिस गरेको छ । बैठकमा १ नम्वर प्रदेश सभाका सांसद तथा विधायन समितिका अध्यक्ष इन्द्रमणी पराजुली, सांसदद्वय निरन राई, लिला सुब्बाले बर्षाले घर भत्किएर विचल्लीमा परेकाहरुको घर चाडै पुनर्निर्माणका लागि पहल गर्ने बताए ।
सो अवसरमा जिल्ला समन्वय समितिका प्रमुख टंक चुवान, महालक्ष्मी नगरपालिकाका प्रमुख पर्शुराम नेपाल, धनकुटा नगरपालिकाका उपप्रमुख शकुन्तला बस्नेत, पाख्रीवास नगरपालिकाका उपप्रमुख देवकला तिम्सिना, छथरजारेपाटी गाउँपालिका अध्यक्ष शेरबहादुर लिम्बु, सहिदभूमी गाउँपालिकाका उपाध्यक्ष रत्नेश्वरी राईले बर्षाले निवेदन दिन छुट भएकाहरुलाई पनि विस्तारै समेट्नु पर्ने र राहत उपलब्ध गराउनु पर्नेमा जोड दिए ।
समितिका संयोजक तथा प्रजिअ विमलीको अध्यक्षतमा सम्पन्न बैठकमा सहायक प्रजिअ भोजराज श्रेष्ठ, जिल्ला समन्वय अधिकारी रामनारायण श्रेष्ठ, समितिका सदस्यहरु धनकुटा उद्योग बाणिज्य संघका अध्यक्ष विजयसन्तोषी राई, नेपाल पत्रकार महासंघका अध्यक्ष राजेश्वरबहादुर श्रेष्ठ, रेडक्रस सोसाईटीका अध्यक्ष हरि राई, वरख गण सल्लेरी ब्यारेकका गणपति कर्णेल भगवान थापा, जिल्ला प्रहरी कार्यालयका एसपी गोविन्द अधिकारी, राष्ट्रिय अनुसन्धानका प्रमुख तुलसी कटेल, नेकपाका नरेन्द्र पोखरेल, नेपाली कांग्रेसका दिनेश राई लगायत धारणा राखेका थिए ।
सो अवसरमा स्वास्थ्य कार्यालयका प्रमुख तुलसी गुरागाईले अहिलेसम्म कोरोना भाईरसले पारेका प्रभावको वारेमा जानकारी प्रस्तुत गरेका थिए । कार्यक्रमको जिल्ला प्रशासन कार्यालयका प्रशासकीय अधिकृत जयराम श्रेष्ठले सहजीकरण गरेका थिए ।
