धनकुटा मंसिर २३ । धनकुटा सिटी जेसिजको आयोजनामा खुल्ला कविता तथा बक्तृत्वकला प्रतियोगिता सम्पन्न भएको छ । प्रतियोगितामा कवितातर्फ शान्ता ढकाल प्रथम, मनिषा खनाल द्वितीय र जिशिका लुईटेल तृतीय भईन । यस्तै कोभिड १९ ले शिक्षा क्षेत्रमा पारेको प्रभाव विषयक बक्तृत्वकलातर्फ अप्सनी राई प्रथम, भावना निरौला द्वितीय र समीक्षा राई तृतीय भईन ।
प्रतियोगिताका विजेताहरुलाई प्रमुख अतिथि तथा नेपाल पत्रकार महासंघका अध्यक्ष राजेश्वरबहादुर श्रेष्ठ, प्यारा लिगलका अध्यक्ष कोपिला शंकर, जेसिजका पूर्व उपाध्यक्ष कैलाश खाकी श्रेष्ठ, सिटी जेशिजका अध्यक्ष रामप्रसाद गौतमलगायतले प्रमाणपत्र र नगद पुरस्कार वितरण गरेका थिए ।
सो अवसरमा प्रमुख अतिथि श्रेष्ठले सामाजिक सेवाका क्षेत्रमा जेसिजले निर्वाह गरेको भूमिका प्रशंसनीय रहेको बताए । उनले धनकुटामा सुविधा नभएको समयमा ऐतिहासिक राष्ट्रिय महाधिवेशन गर्न सफल भएको धनकुटा जेसिज विघटन हुनु दुखद भएको बताए । उनले लामो समयको अन्तरालमा धनकुटा सिटी जेसिजका रुपमा सामाजिक सेवाको क्षेत्रमा अग्रसर भएकोमा बधाई दिए ।
प्रमुख अतिथि श्रेष्ठले सिटी जेसिजले पनि पहिलेको जेसिजको गौरवपूर्ण सेवालाई निरन्तरता दिन सुझाव दिए । उनले धनकुटामै पहिलो पटक गठन भएको जुनियर जेसिज पुन ब्युझाउनु पर्ने धारणा व्यक्त गरे ।
सो अवसरमा जेसिजका पूर्व उपाध्यक्ष कैलाश श्रेष्ठले युवाको व्यक्तित्व र क्षमता अभिबृद्धिका लागि जेसिज सहयोगी हुने बताए । उनले जेसिजले मानिसमा रहेको लुकेको प्रतिभा उजागर गर्न मद्दत गर्ने बताए ।
यस्तै पूर्व अध्यक्ष रमेश पौडेलले धनकुटामा सााजिक क्षेत्रमा सिटी जेसिजले गरिरहेको प्रयासका वारेमा जानकारी दिए । सो अवसरमा सिटी जेसिजका अध्यक्ष रामप्रसाद गौतमले जेसिज धनिहरको संस्था भन्ने आमयुवामा भ्रम रहेको बताउँदै जेसिज धनिहरुको नभई धनि बनाउने संस्था रहेका बताए ।
कार्यक्रम संयोजक तथा जेसी करुणा कटुवालको अध्यक्षतामा भएको कार्यक्रममा प्यारालिगलका अध्यक्ष कोपिला शंकरलगायतले मन्तव्य राखेका थिए ।
