धनकुटा । जापान नेपाल मैत्री परिषद्ले विद्यार्थीलाई शैक्षिक र स्वास्थ्य सामाग्री प्रदान गरेको छ । सो सामग्री परिषदले महालक्ष्मी नगरपालिकाका चार विद्यालयका ८७ जना विद्यार्थीहरुलाइृ प्रदान गरेका हुन् ।
सो सामग्री परिषदले महालक्ष्मी–९ स्थित राम माध्यमिक विद्यालय, सिंहदेवी माध्यमिक विद्यालय, मुर्तीमहेश्वर माध्यमिक विद्यालय र महालक्ष्मी–८ स्थित रामवेनी आधारभूत विद्यालयका छात्र–छात्रालाई प्रदान गरिएको हो ।
सामग्री राम माध्यमिक विद्यालयको ६४ औं बार्षिकोत्सवको अवसरमा ती विद्यालयका विद्यार्थीलाई प्रदान गरेको जनाएको छ । परिषदले कक्षा १ देखि १० सम्मका विद्यार्थीहरुलाई एक बर्षसम्म लेख्न पुग्ने कापी, कलम, १÷१ बट्टा सेनिटाईजर र १÷१ प्याकेट मास्क प्रदान गरिएको राम मा.वि.का प्रधानाध्यापक एन्नरसिंह अधिकारीले जानकारी दिए ।
सो सामग्री महालक्ष्मी नगरपालिकाका प्रमुख पर्शुराम नेपाल, महालक्ष्मी–९ का वडाध्यक्ष बोधनाथ काफ्ले, नगरका शिक्षा शाखा प्रमुख पुष्पबहादुर कटुवाल, परिषद्का अध्यक्ष चन्द्र भण्डारी, राम मा.वि.का विद्यालय व्यवस्थापन समिति अध्यक्ष भीमशंकर अधिकारीलगायतले प्रदान गरेका हुन् । परिषद्ले हरेक बर्ष विद्यार्थीहरुलाई विभिन्न सामग्री प्रदान गर्दै आएको प्रधानाध्यापक अधिकारीले जानकारी दिए ।
सामग्री प्रदान गर्दै प्रमुख नेपालले देश निर्माणका लागि शिक्षित नागरिकको आवश्यक हुने बताए । उनले त्यसका लागि विद्यालयहरुमा शैक्षिक गुणस्तर सुधार आवश्यक रहेको बताए । उनले विद्यालय सुधारका लागि नगरपालिकाले सहयोग र हातेमालो गर्ने प्रतिवद्धता जनाए । यस्तै परिषद्का अध्यक्ष भण्डारीले कोरोनाको महामारीले पठनपाठनमा समस्या उत्पन्न भएको बताउँदै स्वास्थ्य सावधानी अपनाएर पठन–पाठन सुचारु गर्नु पर्ने बताए ।
सो अवसरमा राम मा.वि.ले विद्यार्थीहरुलाई छात्रवृत्ति प्रदान गरेको छ । कक्षा १ देखि १० सम्मका उत्कृष्ट विद्यार्थीलाई पुरस्कृत गर्नुका साथै ८ कक्षाका उत्कृष्ट छात्र–छात्रा र एसईईका उत्कृष्ट तीन विद्यार्थीलाई छात्रवृत्ति प्रदान गरिएको विद्यालयले जनाएको छ ।