धनकुटान्यूज पुष २७ ।
हिजो आईतवार विहान करिव ९ः३० वजे विद्यालय जाँदै गरेकी एक छात्राको ट्याक्टरले किचेर घटनास्थल मै मृत्यु भएको छ । धनकुटा नगरपालिका वडा नं.८ पेलेकपाङकी १५ वर्षिया रेविका आठपहरिया राईको विद्यालय आउने क्रममा सिरवानीमा प्रदेश १–०२–००३ त ६१२ नम्वरको ट्याक्टरले किचेर घटनास्थल मै मृत्यु भएको हो । उनी त्रिवेणी माविमा कक्षा–९ मा अध्ययनरत छात्रा भएको प्रधानाध्यापक्र.दिपक पोख्रेलले जानकार िदिए । उनी सोहि विद्यालयको कक्षा ५ मा अध्ययनरत आफ्नी वहिनी लोजिनासँगै विद्यालय गईरहेकि थिईन् ।
मृतक रेविकासँग सहपाठी मोनिका आठपहरिया र कक्षा–२ मा अध्ययनरत छात्र प्रतिक आठपहरिया पनि सँगै थिए । उनीहरु तीनै जना सकुशल रहेका छन् । घट्नामा परी मृत्यु भएकी छात्रा इन्द्र आठपहरियाका जेठी छोरी हुन् । उनको २ छोरी त्रिवेणी माविमा अध्ययन गर्दै आएका थिए । घटनाका स्थानीय प्रत्यक्षदर्शी देवान कान्छाले एकछिन विद्यार्थी आउँदैछन् ट्रली नहल्ला भन्दाभन्दै जर्वजस्ती ट्याक्टर चालकले बालुवा अनलोड गर्दा ट्रली घोप्टिएर सेविकालाई लागेको बताए । उनले ट्रली आफुतिर आएको देखेपछि विद्यार्थीहरु भागेका थिए । तर, भाग्दाभाग्दै ट्रलीले लागेर आफ्नो आँखै अगाडी रेविकाको मृत्यु भएको दुःखसाथ बताए ।
सो ट्रयाक्टर स्थानीय देवी श्रेष्ठको निर्माणाधीन घरमा बालुवा बोकेर आएका थिए । बालुवा अनलोड गर्ने क्रममा हाईड्रोलिक ट्रली पल्टिएर दुर्घटना भएको जिल्ला ट्राफिक प्रहरी प्रमुख सुरेन्द्र खड्काले जानकारी दिए । दुर्घटनापछि ट्याक्टरका चालक भागेर प्रहरीको सम्पर्कमा पुगेका थिए । घटनामा लापर्वाही देखिएकोले ट्याक्टर चालकलाई कडा कार्वाही गर्नुपर्ने प्रत्यदर्शीको भनाई छ । यस्तै पीडित परिवारलाई उचित क्षतिपुर्ति दिलाउनु पर्ने बताए । स्थानीयका अनुसार विद्यालय समयमा लोड गाडीहरु प्रवेशमा रोक लगाउनस पर्नेतर्फ औल्याए । घट्नापछि मृतक छात्राको लाशलाई जिल्ला अस्पतालमा पोष्टमार्टम गरिएको थियो ।
क्षतिपुर्तिको विषयमा कुरो नमिल्दा शव उठेन
सो दुर्घटनामा ज्यान गुमाएका परिवारले ११ लाख रुपैयाँ क्षतिपुर्ति स्वरुप पाउनु पर्ने माग अघि सारेका छन् । पीडित परिवार र ट्याक्टर धनीवीच क्षतिपुर्तिको विषयमा सहमति जुट्न नसके पछि शव उठाएका छैनन् । परिवारले ट्याक्टर चालकको लापर्वाही भन्दै चालकलाई कडा भन्दा कडा कार्वाही गर्नु पर्ने माग गर्दै हिजो आईतवार जिल्ला प्रहरी कार्यालय दिनभर घेराउ गरेका थिए ।
प्रहरी कार्यालयमा पीडित पक्ष र धनकुटा–६ घर भएका गाडी मालिक नारायण विश्वकर्माविच क्षतिपुर्तिको विषयमा छलफल भएको थियो । पीडित पक्षले १ लाख क्रियाखर्च र १० लाख क्षतिपुर्ति दिनु पर्ने तर गाडी मालिकले १ लाख, क्रिया खर्च र ५ लाख क्षतिपुर्ति दिने भएपछि सहमति जुट्न नसकेको धनपा–८ का वडाध्यक्ष सुमन आठपहरियाले बताए । पीडित पक्षले उचित क्षतिपुर्ति नपाएसम्म लाश नउठाउने बताए ।
विद्यालय व्यवस्थापन समितिका अध्यक्ष सुरेन्द्र आठपहरियाको अध्यक्षतामा बसेको बैठकले गाडी मालिक विक माविको लेखापाल भएकाले क्षतिपुर्तिको विषयमा सहमति नजुटेसम्म निलम्वन गरिएको छ । विद्यार्थीहरुको अभिभावकहरुले गाडी मालिक विकलाई हटाउन दवाव दिएपछि निलम्वन गरिएको अध्यक्ष सुरेन्द्र आठपहरियाले जानकारी दिए ।
यता गाडी मालिक विकले क्रियाखर्चसहित ६ लाख दिन्छु भन्दा पनि निलम्वन गर्नेसुन्दा दुःख लागेको बताए । उनले आफुसँग पैसा छैन, वीमाले दिने ५ लाख र क्रियाखर्च १ लाख तत्काल दिने भन्दा पनि सहमति नभएको दुःखेसो पोखे । उनले बढीमा ७ लाखसम्म दिन सकिने सो भन्दा बढी दिन नसकिने भन्दै बरु जेल बस्न तयार हुने बताए ।
मृतक रेविकाका पिता बैदेशिक रोजागारीको सिलसिलामा साउदी अरबमा छन् । आमा फुलकुमारी आठपहरियाल भने घरमा छिन । उनले लापार्वाही गर्ने चालकलाई कडा भन्दा कडा कार्वाही र उचित क्षतिपुर्तिको माग गर्दै सहयोग गर्न आग्रह गरिन ।