धनकुटान्यूज पुष २७ ।
नेपाल एकीकरण भएको सम्झना स्वरुप मनाईने राष्ट्रिय एकता दिवस तथा पृथ्वी जयन्तीको अवसरमा आज बरख गण सल्लेरी व्यारेकको संयोजनमा पदयात्रा कार्यक्रम सम्पन्न भयो । वरख गणको संयोजन तथा आयोजनामा ऐतिहासिकस्थल साँगुरगढीदेखि फेदीसम्मको पदयात्रा गरिएको थियो । सो मार्ग पृथ्वीनारायण शाहले पूर्व एकीकरण गर्ने क्रममा हिडेको मार्गसमेत मानिन्छ ।
सो पदयात्रा कार्यक्रमको पूर्वी पृतना इटहरीका पृतनापति सन्तोषकुमार ढकाल र साँगुरीगढी गाउँपालिकाका अध्यक्ष कुमार जंग याखाले रिवन काटेर शुभारम्भ गरेका थिए । सो पदयात्रामा श्री नं. २ बाहिनी अड्डा हिलेका बाहिनीपति चोकबहादुर ढकालको समेत सहभागिता रहेको गणपति थापामगरले जानकारी दिए ।
यस्तै सो पदयात्रामा प्रमुख जिल्ला अधिकारी बाशुदेव दाहाल, धनकुटा नगरपालिकाका प्रमुख प्रशासकीय अधिकृत रामबहादुर थापा, प्रहरी प्रमुख एसपी गोविन्द अधिकारी, रेडक्रसकर्मीहरु, जिल्लाका विभिन्न संघसंस्थाहरु, सरकारी कार्यालयका प्रमुखहरु, सामाजिक व्यक्तित्व, सुरक्षा निकायलगायत सर्वसाधारणहरुसमेत गरी दुई सय ५० जना जतिको सहभागीता रहेको वरख गणका गणपति कर्णेल भगवान थापा मगरले जानकारी दिए ।
पदयात्रा सकेपछि प्रहरी प्रमुख एसपी गोविन्द अधिकारीले यात्रा स्मरणीय भएको प्रतिक्रिया दिए । उनले आफु सानो छदाँ यो बाटो हिड्न नपाएको भएपनि आज हिड्न पाउँदा खुसी लागेको बताए । उनले पहिले बाबु वाजेले नूनदेखि सम्पूर्ण आवश्यक सामग्री धरानमा लिन गएर फर्केको कथा सुनदै आएपनि आफु हिड्न नपाएको बताउ । उनले आफुहरु संखुवासभाबाट हिले छिन्ताङको बाटो चतरा हुदै धरान जाने गरेको जानकार िदिए । उनले यो अवसर दिलाएकोमा बरख गण परिवारलाई धन्यवाद दिए ।
यस्तै यात्रा रमाइलो र यो क्षेत्रको पर्यटनका लागि छोटो पदयात्राको रुट बन्न सक्ने धनकुटा लेडिज जेसिजका पूर्व अध्यक्ष प्रमिशा श्रेष्ठ थापाले प्रतिक्रिया दिए ।
पदयात्रीहरुलाई धारापानीमा स्थानीय राई जातिको सांस्कृतिक नृत्य प्रदर्शन गरी स्वागत गरिएको गणपति थापाले जानकारी दिए । उनले एकता दिवसको अवसरमा गत वर्षपनि यो मार्गमा पदयात्रा गरिएको जानकारी दिए । यसलाई स्थानीय तहहरुको साथै स्थानीयवासीहरुको साथ र सहयोग रहेमा बरख गणले आगामी वर्षहरुमा पनि निरन्तरता दिने प्रतिवद्धता जनाए । उनले यो ऐतिहासिक मार्गलाई छोटो दुरीको पदयात्रा गर्न चाहने पर्यटकहरुका लागि उचित हुने प्रतिक्रिया दिए । उनले यसका लागि प्रचारप्रसार गर्नु पर्ने र ठाउँठाउँमा बाटो मर्मत गर्नुपर्ने बताए ।
सो कार्यक्रममा धनकुटा नगरपालिकाले यात्रीहरुका लागि भेष्टको र साँगुरीगढी गाउँपालिकाले फेदीमा खानाको व्यवस्था गरिदिएको गणपति थापाले जानकारी दिए । यस्तै यात्रीहरुलाई फलफुल र पानीको व्यवस्था भेडेटार होटल एशोसियशनले गरिदिएको थापाले जानकारी दिए ।
यात्राको क्रममा घाईते भएकाहरुलाई तत्काल रेडक्रसकर्मी र सेनाका जवानहरुद्वारा उद्धार गरिएको सहभागी विमर्शमान अमात्यले जानकारी दिए ।
