धनकुटान्युज १ चैत्र ।
महालक्ष्मी नगरपालिको मूर्तिढुगा गणेशटारमा नेपाली कांग्रेसले पार्टी समायोजनका साथ गरिखाने कार्यक्रम सम्वन्धि सचेतना कार्यक्रम सम्पन्न गरेको छ । सो कार्यक्रमको नेपाली कांग्रेसका सहमहामन्त्री तथा पूर्व मन्त्री सुनिलबहादुर थापाले उद्घाटन गरेका थिए । सो अवसरमा सहमहामन्त्री थापाले कम्युनिष्टहरुको आपसी द्वन्द्वले मुलुक अनिर्णयको बन्दी हुने सम्भावना बढेको बताए । उनले सत्तारुढ दलहरुको आन्तरिक कार्वाहीले कसैको पनि बहुमत पुग्ने सम्भावना नहुने अवस्था सृजना भई निर्वाचनतर्फ जाने सम्भावना बढेको बताए ।
पूर्वमन्त्री थापाले देशमा स्थायी शान्ति, स्थिरता र विकासका लागि नेपाली कांग्रेसको विकल्प रहेको बताए । उनले निर्वाचन भए स्थिरता रोज्ने कि अस्थिरता भन्दै धनकुटाको विकासका लागि पनि कांग्रेसलाई मतदान गर्न आगह गरे । सो अवसरमा कांग्रेस सभापति अग्नीप्रसाद पौडेलले लोकतन्त्र र संविधानको रक्षाका लागी नेपाली कांग्रेस क्रियाशील रहेको बताए ।
सो अवसरमा जिल्ला सचिव विजयसन्तोषी राईले सवै नेपालीहरुलाई समक्ष बनाउन नेपाली कांग्रेसले गरिखाने अभियान संचालन गरेको बताउँदै गरिखाने अभियानका वारेमा सहजीकरण गरेका थिए । उनले अव प्रत्येक नेपालीलाई उद्यमशील बनाउन गरिखाने अभियानमा जोड्ने वताए । यस्तै जिल्ला सदस्य भक्तलाल मादेन, वडा उपसभापति मानप्रसाद काफ्ले, युवा नेताहरु खगेन्द्र मादेन, मदन घिमिरे, असित थापालगायतले गाउँ गाउँमा नेपाली कांग्रेसको पक्षमा जनलहर ल्याउन क्रियाशील हुनपर्नेमा जोड दिए ।
कांग्रेस महालक्ष्मी नगरपालिका वडा नं. ९ का सभापति प्रेमप्रसाद ढकालको अध्यक्षतमा सम्पन्न भएको कार्यक्रमको संचालन पार्टी सचिव कमल विकले गरेका थिए ।
सो अवसरमा तत्कालीन राप्रपाका ३ सय २ जनालाई नेता तथा कार्यकताहरु कांग्रेसमा समायोजन गरिएको थियो । समायोजन गरिएकाहरुलाई कांग्रसका सहमहामन्त्री सुनिल वहादुर थापा,जिल्ला सभापति अग्नी प्रसाद पौडेल,जिल्ला सचिव विजय सन्तोषी राई, वडा सभापति प्रेम प्रसाद ढकालले टिका तथा अविर लगाई पार्टी सदस्यता दिएका थिए ।
कर्यक्रममा गरिखाने कार्यक्रमको उद्यमशील बनाई व्यवसाय संचालन गर्नका लागी फारम समेत वितरण गरी फारम भर्ने तरिकाको वारेमा जिल्ला सचिव राईले सहजीकरण गरेका थिए ।
