धनकुटा जेठ १२ ।
नेपालमा दास्रो चरणको कोभिड – १९ को संक्रमण फैलिएपछि नेपाल सरकारले पहिलो पटक स्वास्थ्य सामग्री धनकुटा अस्पताललाई प्रदान गरेको छ । धनकुटाबाट प्रतिनिधित्व गरेका प्रतिनिधि सभाका सदस्य राजेन्द्र राइको पहलमा २५ लाख बराबर मूल्यमा ल्याईएको सो स्वास्थ्य सामग्री एक कार्यक्रमका वीच सांसद राईले अस्पतालका निमित्त प्रमुख डा. पुजन विश्वकर्मालाई हस्तान्तरण गरेका छन् ।
सो अवसरमा सांसद राईले जिल्ला अस्पतालमा अक्सिजन ट्यांकीका लागि नेपाल सरकारबाट ७५ लाख रकम विनियोजन भएको जानकारी दिए । उनले सो ट्यांकी जडान गरेपछि पहाडी जिल्लालाई नै अक्सिजन उपलब्ध गराउन सकिने जानकारी दिए ।
हस्तान्तरण गरिएको स्वास्थ्य सामग्रीहरुमा ४० लिटरको अक्सिजन सिलिण्डर १० थान, ५ लिटरको ५ थान रहेको छ । यस्तै अक्सिजन कन्सन्ट्रेटर १ थान, स्यानिटाईजर १० लिटर, पीपीई १० थान, सर्जिकल मास्क ५०० थान, पञ्जा ५० जोर, एन ९५ मास्क १०० थान, थर्ममिटर २ थान, पल्स अक्सिोमिटर १ थान, पीसीआर किट ५००, आरएमए किट ४८०, भिटिएम ६०० र एन्टिजेन किट १०० थान रहेको अस्पतालका निमित्त प्रमुख डा. विश्वकर्माले जानकारी दिए ।
सामग्री बुझेपछि डाक्टर विश्वकर्माले विरामीहरुको उपचारमा थप सहयोग पुग्ने जानकारी दिए । उनले हाल औद्योगिक ग्रामस्थित कोभिड अस्पतालमा १० जना र जिल्ला अस्पतालमा ६ जना कोभिड विरामीहरुको उपचार भैरहेको जानकारी दिए ।
