टंक मावि पूर्व बिद्यार्थी समाज गठन

धनकुटान्यूज
असोज २१, धनकुटा । धनकुटा नगरपालिका २ भीरगाउँस्थित श्रीमान टंक माध्यमिक बिद्यालयमा अध्ययन गरेको पूर्व विद्यार्थीहरुको भेलाले टंक मावि पूर्व विद्यार्थी समाज गठन गरेको छ । पूर्व विद्यार्थीहरुको भर्चुअल मिटिङमार्फत भएको छलफलले १३ सदस्यीय टंक मावि पूर्व विद्यार्थी समाज गठन गरेको जनाएको छ ।
छलफलले राजेन्द्र गुरागाईको संयोजकत्वमा १३ सदस्यीय तदर्थ समिति गठन गरेको हो । तदर्थ समितिको सदस्यहरुमा सुनिल दाहाल, खड्ग निरौला, खगेन्द्र लामिछाने, लक्ष्मण दाहाल, उदय बराल, सीमा बस्नेत, रत्न राना, सिर्जना लामिछाने, कृति खड्का, ईश्वर थापा र कमला तामाङ रहेको जनाएको छ । तदर्थसमितिको सदस्य सचिबमा विद्यालयका प्रधानाध्यापक नरबहादुर विश्वकर्मा रहेका छन् । अहिले गठन भएको यस तदर्थ समितिलाई पछि कोरोना भाईरसको संक्रमण प्रभाव न्यून भएपछि पदाधिकारी तथा सदस्यहरुको भौतिक रुपमा उपस्थिति भएपछि चयन गर्ने तयारी गरिएको प्रधानाध्यापक विश्वकर्माले बताए ।
जिल्लाका पुरानो विद्यालयमध्येको यस विद्यालय विसं २०११ सालमा स्थापित भएको हो । समाजले ग्रामीण क्षेत्रका यस माविका शैक्षिक उन्नयन गर्दै रचनात्मक क्रियाकलाप गर्ने उद्देश्य रहेको जनाएको छ ।
विद्यालय व्यवस्थापन समितिका अध्यक्ष चन्द्रलाल तामाङको अध्यक्षतामा आयोजित भर्चुअल छलफलमा धनकुटा नगरपालिकाकी उपप्रमुख शकुन्तला बस्नेत, शिक्षा विकास तथा समन्वय इकाइ सुनसरीका प्रमुख रमेशबहादुर दाहाल, धनकुटा बहुमुखी क्याम्पसका उपप्राध्यापक यज्ञ गुरागाई, प्रहरी नायब उपरीक्षक सुनिल दाहाल सहभागी थिए । यस्तै फ्युजन एग्रिकल्चर एण्ड फरेष्ट्री विश्वविद्यालय चीनका डाक्टर कुलराज राई, धनकुटा नगरपालिकाका शिक्षा शाखा प्रमुख नगेन्द्रमणि श्रेष्ठलगायतले शुभकामना मन्तव्य राखेका थिए । कार्यक्रममा विद्यालयका प्रधानाध्यापक विश्वकर्माले विद्यालयको अवस्थाको बारेमा जानकारी गराएको थिए भने कार्यक्रमको सञ्चालन शिक्षक सरोज दाहालले गरेका थिए ।

Dhankuta News