धनकुटा । धनकुटा नगरपालिकाले धनकुटा नगरलाई एभोकाडोको राजधानी घोषणा गरेसँगै दोस्रो एभोकाडो महोत्सव आयोजना गरेको छ । दुई दिने महोत्सवको प्रतिनिधि सभा सदस्य सांसद राजेन्द्र राईले एक कार्यक्रमका वीच एभोकाडोको विरुवामा पानी राखेर उद्घाटन गरेका छन् ।
महोत्सव उद्घाटन गर्दै सांसद राईले धनकुटालाई व्यावसायिक एभोकाडो उत्पादनले किसानहरुलाई आर्थिक रुपमा आत्मनिर्भर बनाउने बताए । उनले धनकुटा नगरसँगैे अन्य स्थानीय तहहरुमा पनि एभोकाडोको व्यावसायिक खेती गरेर जिल्लालाई आर्थिक रुपमा सवल र सक्षम बनाउन सकिने दावी गरे । राईले एभोकाडोलाई गुणस्तरीय बनाउनको साथै रोग प्रकोपबाट बचाउन प्राविधिक ज्ञान भएका दक्ष प्राविधिकले एभोकाडो किसानहरुलाई तालिम तथा सल्लाह दिनु पर्नेमा जोड दिए ।
सो अवसरमा स्वागत मन्तव्य दिदै धनकुटा नगरपालिकाका प्रमुख चिन्तन तामाङले सुन्तलाको लागि नाम कहलिएको धनकुटामा पछिल्ला वर्ष रोगकिराका कारण उत्पादनमा कमी आईरहेको समयमा कृषकको आकर्षण एभोकाडोतर्फ बढ्दै गएको बताए । उनले २०७५ सालमा धनकुटा नगरलाई एभोकाडोको राजधानी घोषणा गरेर महोत्सव आयोजना गरेपछि जिल्लाका एभोकाडोले पहिलेभन्दा तेब्बरसम्म मूल्य पाएको बताए ।
प्रमुख तामाङले एभोकाडोको अधिकतम मूल्यका लागि वडा ३ मा उद्योग शुरु भैरहेको जानकारी दिए । उनले नगरपालिकाले एभोकाडोको ब्राण्डिङ गरिरहेको बताए । उनले एभोकाडोको विषय शोधपत्र तयार गरी विद्यावारिधी गर्न चाहने विद्वानहरुलाई नगरपालिकाले आर्थिक सहयोग गर्ने जानकारी दिए ।
प्रमुख तामाङले नगर सभाले मेयर कृषि पर्यटन कार्यक्रमअन्तर्गत एभोकाडोको राजधानी र ड्रागनफल फलको विशेष पकेटक्षेत्र औपचारिक रुपमा पारित गरेर कार्यक्रम अघि बढाइएको जानकारी दिए ।
सो अवसरमा एभोकाडो र ड्रागनफलको राजधानी तथा विशेष पकेटक्षेत्र घोषणा गर्न महत्वपूर्ण भूमिका निर्वाह गरेको भन्दै कृषि अभियान्ता जीवन राईलाई नगद ५ हजार सहित दोसल्ला, सम्मानपत्रले सम्मान गरेका छन् ।
सो अवसरमा भूमि व्यवस्था कृषि तथा सहकारी मन्त्रालय विराटनगरका प्रमुख डा.राजेन्द्र उप्रेतीले धनकुटाको एभोकाडोलाई मदरबोर्डको रुपमा ल्याउने प्रयास गरिहेको वताए । उनले धनकुटा नगरपालिकामा एभोकाडो र पाख्रीवास नगरपालिकामा कफी खेतीका रुपमा सहकार्य गरेर काम गरिहेको बताए ।
सो अवसरमा धनकुटा नगरपालिकाका प्रमुख प्रशासकीय अधिकृत रामवहादुर थापाले धनकुटा नगरपालिकाका आफ्नै नर्सरी रहेको र आ.व.०७७÷०७८ मा ६० हजार भन्दा वढी एभोकाडोको विरुवा वितरण गरिएको जानकारी दिए । उनले नगरपालिकाले एभोकाडो क्षेत्रमा काम गर्न थालेपछि धनकुटा ६ मा एभोकाडो पार्क निर्माण गरेको, एशिया महादेश मै पहिलो पटक एभोकाडो महोत्सव आयोजना गरिएकोलगायतको उल्लेखनीय काम गरेको दावी गरे । उनले नगरपालिकाले एभोकाडोको व्यावसायिक खेतीको लागी विविध कार्यक्रम ल्याएपछि नगर क्षेत्रका किसान उत्साहित भएको बताए ।
प्रमुख प्रशासकीय अधिकृत थापाले हालसम्म धनकुटा नगरपालिकाले व्यावसायिक एभोकाडो खेती कार्यक्रमका लागी ७१ लाख रुपैयाँ खर्च गरिसकेको जानकारी दिए ।
सो अवसरमा पाख्रीवास कृषि अनुसन्धान केन्द्रका प्रमुख डा.गोविन्द तिम्सिनाले पाख्रीवासमा एभोकाडो आजभन्दा ४०–४५ वर्ष पहिले रोपिएको जानकारी दिए । उनले एभोकाडोको राम्रोसँग अनुसन्धान गरेर नर्सरी उत्पादन नगर्ने हो भने भावी दिनमा सफल हुन नसक्ने दावी गरे । उनले धनकुटा नगरपालिका र कृषि अनुसन्धान केन्द्र विच सहकार्य गरेर एभोकाडोको क्षेत्रमा काम गरिरहेको वताए ।
धनकुटा नगरपालिकाको वडा नं.१ देखि १० सम्मको विभिन्न वडामा ६० हजारदेखि १ लाखसम्म एभोकाडोको बिरुवा कृषकहरुले रोपेका छन् । धनकुटा नगरपालिका क्षेत्रमा बार्षिक रुपमा ९० मेट्रिक टन एभोकाडो उत्पादन हुने गरेको जनाईएको छ । नगर क्षेत्र भित्र ५ हजार ७ सय ६४ एभोकाडोको बोटबाट फल उत्पादन भइरहेको छ । बार्षिक रुपमा ९० हजार ७ सय ५० केजी भन्दा वढी एभोकाडो फल उत्पादन भएको छ । आगामी ५ वर्षभित्र धनकुटा नगरपालिका क्षेत्रमा ३ लाख एभोकाडोको विरुवा रोपी सक्ने नगरपालिकाले कार्ययोजना अघि सारेको छ ।
धनकुटा नगरपालिका एभोकाडो कृषक समूहको अध्यक्ष खेमराज थापाको अध्यक्षतमा सम्पन्न महोत्सवको उद्घाटन सत्रमा प्रदेश माननीय निरन राई, इन्द्रमणी पराजुली, जिल्ला समन्वय समितिका प्रमुख टंक चुहान, उद्योग वाणिज्य संघ धनकुटाका वरिष्ठ उपाध्यक्ष तारा तितुङ, सम्मानित व्यक्तित्व कृषि अभियान्ता जीवन राई, पत्रकार महासंघका उपाध्यक्ष विदुर खवासलगायतले शुभकामना मन्तव्य दिएका थिए । कार्यक्रमको सञ्चालन पशासकीय अधिकृत डम्बर रोगुले गरेका थिए ।
महोत्सवमा ३२ वटा भन्दा वढी विभिन्न जातका एभोकाडोको स्टल राखिएका छन् । महोत्सवमा एभोकाडो किन्न, चाख्न, एभोकाडो जाम, चप, तेल, घिउ पाईने आयोजकले जनाएको छ ।
पछिल्लो समय धनकुटामा एभोकाडो व्यावसायिक रुपमा विस्तार हुदै गएको छ । आजभन्दा ४० वर्षभन्दा अघि एभोकाडो खेतीको शुरुवात भएपनि व्यावसायिक रुपमा स्थापित हुनसकेको थिएन ।
