धनकुटा l धनकुटा नगरपालिका वडा नं ९ बेलहराको डुम्रोसान्नेमा सोमबार आयोजित नेपाली कांग्रेसको ऐतिहासिक वृहत कार्यक्रमलाई सम्बोधन गर्ने नेताहरुले आगामि वैशाख २९ गतेसम्म अमेरिका सेना नेपाल कब्जा गर्न आए नेपाली कांग्रेसलाई भोट नदिन बताएका छन् ।
कार्यक्रमलाई सम्बोधन गर्नुहुँदै नेपाली कांग्रेस धनकुटाका जिल्ला सभापति दिनेश राईले वर्तमान नेपाली कांग्रेस सरकारले फुसको छाना हटाएर टिनको छाना लगाउने कार्यक्रम अन्तर्गत धनकुटाका ६ हजार तीन सय घर परिवारलाई टिनको छाना लगाउन नगद रुपैया दिने वताउनुभयो ।
त्यस्तै नेपाली कांग्रेस धनकुटाका जिल्ला सचिव विजय सन्तोषी राईले एमसिसि सम्झौता नेपालीको विकास र समृद्धिको पक्षमा रहेको बताउनुभयो । यदि बैशाख २९ गतेसम्म अमेरिकी सेना नेपालमा आए बैसाख ३० गते हुने निर्वाचनमा नेपाली कांग्रेसलाई मत नदिन समेत सचिव राईले बताउँनुभयो ।
कम्यूनिष्टहरुले आरोप लगाए जस्तो एमसिसि पास भएकाले अमेरिकी सेना आएर नेपालमा हस्तक्षेप हुने कम्यूनिष्टहरुले भ्रम मात्र छरेको उहाँले बताउँनुभयो । उहाँले अमेरिकी सेना नेपाल आएन भने कांग्रेसलाई मत दिई बिजयी गराउन आग्रह गर्नुभयो ।
क्षेत्रीय उपसभापती मिलन खड्गीले आगामी निर्वाचन नेपाली कांग्रेसले जित्ने त्यसका लागी सबै नेता तथा कार्यकर्ताहरु परिचालित भएको बताउनुभयो भने नेपाली कांग्रेस धनकुटा नगरका सभापती नरेश श्रेष्ठले एमसिसि पास भएकाले अब पाँच बर्षमा नेपाल समृद्ध हुने बताउनुभयो ।
धनकुटा नगरपालिका वडा नं १० का उपसभापति देवेन्द्र राईको अध्यक्षतामा सम्पन्न भएको कार्यक्रममा नेपाली कांग्रेसका वडासभापती सुवास विक्रम भट्टराई, नेपाली कांग्रेसका स्थानीय नेताहरु नगेन्द्र पाण्डे, विष्णुकुमारी तामाङ, अमरराज खनाल, भूपलाल तामाङ, रघिविर सुवेदी, चौधरी टोल वस्ती समितिका सभापति बिन्द्र कार्की, धर्मशाला टोल समितिका सभापती महेन्द्र तामाङ, विजयखर्क टोल समितिका सभापती टेकबहादुर राना, मन्धरा टोल समितिका सभापति भरत पराजुली, वडा सचिव सुरेश श्रेष्ठ लगायतले धनकुटा नगरपालिकाका वडा नं १० मा नेपाली कांग्रेसको पक्षमा जनलहर बढ्दै गएकाले यस पटक कांग्रेस निर्वाचन जित्ने बताउँनुभयो ।
उक्त भेलाले योगेन्द्र दाहालको सभापतित्वमा १५ सदस्यीय डुम्रे सान्ने नेपाली कांग्रेस टोल समिति गठन गरेको छ । जसको उपसभापतिमा उर्मिला अधिकारी, सचिव कृष्णबहादुर अधिकारी र सदस्यहरुमा विष्णु पौडेल, लक्ष्मी राई, गोपाल अधिकारी, सुवास तामाङ वकिल दाहाल लगायत १५ सदस्यीय रहनुभएको छ ।
यसैगरी नेपाल तरुण दल टोल समिति पनि गजेन्द्र राई अध्यक्ष, रेनुका थापा उपाध्यक्ष, कृष्ण पौडेल सचिव, दुर्गा बहादुर दाहाल सहसचिव र सदस्यहरुमा प्रकाश अधिकारी, डगेन्द्र पौडेल, अमर श्रेष्ठ, गणेशबहादुर श्रेष्ठ, योगेन्द्र वहादुर दाहाल, रञ्जना राई, बिनोद घिमिरे, प्रदिप राई, सन्तोष अधिकारी, गोपाल अधिकारी, टिकाप्रसाद सुवेदी र टुवराज जिवी रहनुभएको पार्टी सचिव सुरेश श्रेष्ठले बताउँनुभयो ।
धनकुटाको बेलहारामा दुई महिनाको अवधिमा ३ सय ४२ जना विभिन्न पार्टीहरु परित्याग गरी नेपाली कांग्रेसमा प्रवेश गरिसकेको र संगठन पनि टोल(टोलसम्म गठन गरि परिचालित गरिएकोले नेपाली कांग्रेसले यस पटक निर्वाचन जित्ने पक्का भएको जिल्ला सचिव तथा नगर संयोजक विजयसन्तोषी राई दावी गर्नुहुन्छ ।