धनकुटा । वैशाखमा हुने स्थानीय निर्वाचनका लागि धनकुटामा सत्तारूढ गठबन्धनका दलहरुले तालमेल गरेर जाने सहमति गरेका छन् ।
सत्तारूढ नेपाली कांग्रेस, नेकपा माओवादी केन्द्र, नेकपा एकीकृत समाजवादी र जनता समाजवादी पार्टीले ०७९ वैशाख ३० मा हुने स्थानीय तहमा गठबन्धन गरेर जाने गर्ने निर्णय गरेका हुन् ।
स्थानीय तहमा तालमेल गर्ने निर्णय गर्दै सोमबार पत्रकार सम्मेलन गरेका छन् । पत्रकार सम्मेलनमा सार्वजनिक भएको विज्ञप्तीमा कांग्रेसका धनकुटा सभापति दिनेश राई, नेकपा माओवादी केन्द्र धनकुटा संयोजक डिल्लीराम राई, नेकपा एकीकृत समाजवादी धनकुटा अध्यक्ष अर्जुन राई र जनता समाजवादी पार्टी धनकुटा अध्यक्ष बलबहादुर राईले हस्ताक्षर गरेका थिए ।
पत्रकार सम्मेलनमा कांग्रेस जिल्ला सभापति दिनेश राईले स्थानीय तहमा तालमेल गरेर जाने निर्णय भएको बताउनु भयो । स्थानीय तहका आवश्यकताको आधारमा गठबन्धन गरेर अघि बढ्ने सहमति भएको राईले बताउनु भयो। ‘बैशाखमा हुने स्थानीय तहको निर्वाचनमा एकतावद्ध ढंगले जाने निर्णय गरेका छौं।,’ उहाँले भन्नुभयो, ‘अब संयुक्त रुपमा कार्यक्रम गरिने छ ।’
‘स्थानीय निर्वाचनलाई लक्ष्यित गरेर वडा तहबाट उमेद्धारको सिफारिस आउन थालेका छन।’ राईले भने ‘उमेद्धारको सिफारिस गर्दा गठबन्धनलाई ध्यान देउ भनेर वडासम्म भनेका छौ ।’
नेकपा एकीकृत समाजवादी धनकुटाका अध्यक्ष अर्जुन राईले स्थानीय चुनावका लागि चार दलीय गठबन्धन गरिएको बताउनु भयो। ‘संविधान, जनहित, लोकतन्त्र रक्षाका लागि स्थानीय चुनावमा सहकार्य गरेर जाने हो,’ उहाँले भन्नुभयो, ‘धनकुटाको आवश्यकताका आधारमा गठबन्धन गरेका हौँ र हरेक कुरामा सहकार्य गर्दै जाने प्रतिवद्धता जनाउँदछौं ।’
गत २०७४ सालमा भएको स्थानीय तहको निर्वाचनमा धनकुटा ७ वटा स्थानीय तहको प्रमुख उपप्रमुख सहित एमाले ४३ वडामा, कांग्रेसले ९ वटा वडामा, माओवादी केन्द्रले ५ वटा वडा र जनता समाजवादी पार्टीले ३ वटा वडामा विजयी भएका थिए ।
