धनकुटा । सहिद प्रकाश थापा स्मृति ट्रष्ट धनकुटाले सहिदभूमि गाउँपालिका वडा नं. १ घंगरुस्थित अनिवार्य निःशुल्क आधारभुत विद्यालयमा अध्ययन विद्यार्थीहरुलाई टिफिनक्यारी वितरण गरेको छ ।
आइतवार विद्यालय परिसरमा एक कार्यक्रमको आयोजना गर्दै शिशुदेखि (वालशिक्षा) ५ कक्षा सम्म अध्ययनरत ८५ जना विद्यार्थीलाई टिफिनक्यारी वक्स र चम्चा १÷१ थानका दरले वितरण गरेको हो ।
घरमा पाकेको खानेकुरा टिफिन बक्समा ल्याएर विद्यालयमा खाजा खान विद्यार्थीहरुलाई सहज होस् भन्ने उद्देश्यले वितरण गरिएको सहिद प्रकाश थापा स्मृति ट्रष्ट धनकुटाका अध्यक्ष दिलवहादुर थापाले बताए ।
उनका अनुसार ट्रष्टको उक्त टिफिनक्यारी वक्स वडाका अन्य दुई अनिवार्य माध्यमिक विद्यालय र जनकल्याण प्राथमिक विद्यालयमा एक हप्ता भित्र वितरण गर्ने योजना रहेकोछ ।
विद्यार्थीहरुलाई वितरण गरिएको टिफिनक्यारी धरान उपमहानगरपालिका वडा नं. १६ स्थित प्रकाश सप्लायर्सले सौजन्य गरिदिएको हो ।
टिफिनक्यारी वितरण कार्यक्रमको संचालन ट्रष्टका सचिव अर्जुन थापाले गर्नुभएको थियो । कार्यक्रममा ट्रष्टका उपाध्यक्ष लक्ष्मी माझि, कोषाध्यक्ष मञ्जु थापा, सदस्यहरु लक्ष्मण राई, माया राई, अम्बिका थापा, विद्यालयका प्रधानाध्यापक प्रकाश राई लगायत शिक्षकहरुको उपस्थिति थियो ।
सहिदभूमि गाउँपालिका वडा नं. १ का वासिन्दा प्रकाश थापा नेपाल प्रहरीमा कार्यरत असई हुनुहुन्थ्यो । २०५७ सालमा कालिकोट जिल्लामा कार्यरत रहँदा शसस्त्र द्वन्दको बेला माओवादीसँगको भिडन्तमा परि थापा सहादत हुनुभएको ट्रष्ट सल्लाहकार समितिका सदस्य रमेश राईले बताउँनु भयो । उहाँको सम्झनामा २०७६ सालमा ट्रष्टको स्थापना भएको थियो ।