धनकुटा । नेपाल पत्रकार महासँघको ६७ औ स्थापना दिवसको अवसर पारेर तीन जना सञ्चारकर्मीहरुले नेपाल पत्रकार महासंघ जिल्ला शाखा धनकुटाद्वारा स्थापित पत्रकार कल्याणकारी कोषमा आर्थिक सहयोग प्रदान गर्नुभएको छ ।
नेपाल पत्रकार महासंघ धनकुटाका सल्लाहकार तथा कान्तिपुर दैनिकका उपसम्पादक रमेशचन्द्र अधिकारी, नेपाल पत्रकार महासंघ जिल्ला शाखा धनकुटाका उपाध्यक्ष एवं रेडियो नेपाल धनकुटामा व्यापार अधिकृत पदमा कार्यरत देवकला कार्कीले जनही दश हजार पाँच सय पचपन्न रुपैया र संखुवाभाको मुढेशनिश्चरे बजारबाट सञ्चालित रेडियो नयाँ अभियानका स्टेशन म्यानेजर दुर्गेश (दुर्गामणी) पौडेलले पाँच हजार पाँच सय पचपन्न रुपैया कल्याणकारी कोषमा आर्थिक सहयोग गर्नुभएको हाे ।
आर्थिक सहयोग हस्तान्तरण गर्नुहुँदै नेपाल पत्रकार महासंघका सल्लाहकार अधिकारीले आफू आवद्ध मिडियाबाट पाउने पारिश्रमिकबाट केहि रकम छुट्याएर कोषलाई सहयोग गरेको बताउँनु भएको थियो ।उहाँले पत्रकार कल्याणकारी कोष मार्फत सवै पत्रकारलाई सेवा पुग्न सकोस र थप अरुवाट पनि सहयोग रकम आउन सकोस् भन्ने उद्देश्य रहेको बताउँनु भयो ।
त्यस्तै महासंघका उपाध्यक्ष कार्कीले पत्रकारहरुको कल्याणका लागि सहयोग पुगो्स भन्ने उदेश्यले सहयोग रकम प्रदान गरेको प्रतिक्रिया दिनुभयो । यसैगरी रेडियो नयाँ अभियानका स्टेशनम्यानेजर पौडेलले पनि आफुले काम गरेको मिडियाबाट पाउने पारिश्रमिकबाट केहि रकम छुट्याएर सहयोग गरेको बताउँनु भयो । उहाँले आफुले प्रदान गरेकाे रकमले कोषलाई केहि सहयोग र अरुका लागि उत्पेरणाको स्रोत बन्न पुगोस् भन्ने उद्देश्य रहेको बताउँनु भयो ।
नेपाल पत्रकार महासंघ धनकुटा शाखाले पत्रकारहरुलाई हुने कुनै स्वास्थ्य सम्वन्धि समस्या तथा विपत्तिमा सहयोग गर्ने उद्देश्यले पत्रकार कल्याणकारी कोष स्थापना गरिएको कोषका संयोजक तथा नेपाल पत्रकार महासंघ धनकुटा शाखाका सचिव हरिवहादुर लम्जेलले बताउँनु भयो । उहाँका अनुसार सहयोगी दाताहरुबाट प्राप्त रकम सप्तकोशी डेभलपमेन्ट वैंक धनकुटा शाखामा रहेको कल्याणकारी कोषको मुद्दती खातामा जम्मा गरिनेछ । मुद्दति खाताबाट आउने ब्याजको रकमबाट पत्रकारलाई आपत्तविपत पर्दा सहयोग गरिने उहाँको भनाई छ ।
आर्थिक सहयोग हस्तान्तरण कार्यक्रम शाखाका अ्रध्यक्ष नगेन्द्र राईको अध्यक्षतामा सम्पन्न भएको थियो । कार्यक्रममा महासंघका केन्द्रीय सदस्य सरिता वराईली राई लगायतकाले मन्तव्य राख्नुभएको थियो ।
