धनकुटा । स्थानीय तह निर्वाचनको मिति नजिएसँगै धनकुटा नगरका लागि सत्ता गठबन्धन दलहरुले वडा वाडँफाड र उम्मेदवारी छनौट गर्न सोमवारदेखि बैठक शुरु गरेका छन् ।
धनकुटा नगरपालिकामा सत्तारुढ दलहरुले गठबन्धन गरी स्थानीय तहको निर्वाचन जित्ने उद्घोष गर्दै गठबन्धनको नगरस्तरीय संयन्त्रको बैठकले वडाहरु वाँडफाड र उम्मेदवार छान्न अहिले क्रियाशील भएका हुन् ।
धनकुटा नगरस्तरीय सत्ता गठवन्धनको बैठकमा नेपाली कांग्रेस धनकुटका नगर सभापती नरेश श्रेष्ठ, नेकपा माओवादी केन्द्र धनकुटा नगरका अध्यक्ष हेमचन्द्र किराती, नेकपा एकिकृत समाजवादी धनकुटा नगरका अध्यक्ष सुजन भाई जोशी, जनता समाजवादी पार्टी धनकुटा नगरका अध्यक्ष दिलकुमार राईले आ-आफ्नो पार्टीको तर्फबाट वडाहरुको दावी र प्रमुख तथा उपप्रमुखहरुको दावी प्रस्तुत गर्दै प्रतिवेशन प्रस्तुत गर्नुभएको थियो ।
सो अवसरमा नेपाली कांग्रेस धनकुटाका जिल्ला सचिव तथा धनकुटा नगर संयोजक विजय सन्तोषी राईले धनकुटामा कुनैपनि हालतमा गठबन्धन गरी नेकपा एमालेलाई पराजित गरी धनकुटाको विकास र समृद्धिका ढोका खोल्ने वताउनुभयो ।
नेकपा माओवादी केन्द्र धनकुटा नगरका संयोजक गणेश विष्टले नेकपा एमाललेको ज्यादती र अधिनायकबादको विरुद्ध गठबन्धन भएको र गठबन्धनले निर्वाचन जित्ने दावी गर्नुभयो ।
यसैगरी नेकपा एकिकृत धनकुटा जिल्लाका सचिवालय सदस्य मनोज राई, जनता समाजवादी पार्टी धनकुटा जिल्लाका कोषाध्यक्ष सरोज आठपहरिया, नेपाली कांग्रेस धनकुटा नगरका उपसभापति अमित लो तामाङ, नेकपा माओवादी केन्द्र धनकुटा नगरका सचिव खगेन्द्र विष्ट लगायतले गठबन्धन आवश्यकता र बाध्यता दुवै भएकाले धनकुटा नगरपालिकामा गठबन्धन गरी निर्वाचन जित्नेका सवैको सम्मानजनक सिट बाडँफाड हुने वताउँनुभयो ।
धनकुटा नगरपालिकामा गठबन्धन गरी निर्वाचनमा जाने सत्ता गठबन्धन दलहरुले सहमति गरी प्रमुख तथा उपप्रमुखहरु र वडाहरु वाँडफाड गर्ने कार्य अन्तिम चरणमा पुगेको नेपाली कांग्रेस धनकुटाका जिल्ला सचिव तथा धनकुटा नगर संयोजक विजय सन्तोषी राईले वताउँनुभयो ।
धनकुटा नगरमा नेकपा एमालेलाई परास्त गर्न गठबन्धन गर्नका लागि नेपाली कांग्रेस अत्यन्त्रै लचकताका साथ प्रस्तुत भएकोले सहमति नजिक पुगेको समेत वताउँनुहुन्छ नेपाली कांग्रेस धनकुटा नगर सभापति नरेश श्रेष्ठ ।
धनकुटा नगरपालिकाको स्थानीय तहको निर्वाचनमा सत्तारुढ दलहरुले गठबन्धन गरी निर्वाचनमा जाने निर्णय गर्दै वडा वाँडफाड र प्रमुख तथा उपप्रमुखमा समेत सहमति बन्दै गएपछि धनकुटा नगरमा गठबन्धनको पक्षमा एक्कासी जनलहर बढ्दै गएकोले सवैलाई उत्साहित बनाएको छ ।