धनकुटा । आसन्न स्थानीय तह निर्वाचनमा जिल्लाको सातै स्थानीय तह र ६० वटै वडाहरुमा विजयी हासिल गर्न सत्तारुढ दलहरु गठबन्धन गरी चुनावमा जान नेपाली कांग्रेस धनकुटा जिल्ला कार्यसमितिका सल्लाहकारहरुले सुझाव दिनुभएको छ ।
नेपाली कांग्रेस धनकुटा सभापति दिनेश राईको सभापतित्वमा सम्पन्न सल्लाहकारहरुसँगको छलफल कार्यक्रममा प्रदेश सांसद लिला सुब्बा, नारायण रिजाल, शमसेर गोङ्वा लगायतका सल्लाहकारहरु, महासमिति सदस्य सिता प्रधान, जिल्ला सदस्यहरु रेणु श्रेष्ठ, निरुपा राई लगायतले धनकुटा जिल्लाको सात पालिका र ६० वटै वडाहरुमा सत्ता गठबन्धन दलहरुबीच गठबन्धन गरी निर्वाचन गएर जित्नु पर्नेमा जोड दिनुभयो ।
नेपाली कांग्रेस धनकुटाका जिल्ला सभापति दिनेश राईले सत्ता गठबन्धन दलहरुबीच स्थानीय तहमा सिट बाँडफाँड गरी निर्वाचनमा गएर सबै पालिकाहरु गठबन्धनले जित्ने दावी गर्नुभयो ।
धनकुटामा एमालेको ज्यादति र अनियमिता, अधिनायकवादी शैलीको विरुद्ध गठबन्धन भएको वताउँदै नेपाली कांग्रेस धनकुटाका जिल्ला सचिव विजय सन्तोषी राईले सहअस्तित्वको आधारमा सत्ता पक्ष दलहरुबिच गठबन्धन गरी एमालेलाई धनकुटामा सवै पालिकाहरुमा परास्त गर्ने वताउनुभयो ।
सत्ता रुढ दलहरुविच धनकुटामा गठवन्धन गरी निर्वाचनमा जाने निर्णयसँगै धनकुटामा गठबन्धनको पक्षमा जनलहर बढ्दै गएको दावी छ । भने सत्ता गठबन्धन दलहरुविच अहिले पालिकाहरु र वडाहरुको सिट बाडँफाडमा व्यस्त छन् । सो अवसरमा नेपाली कांग्रेस धनकुटाका सभापति दिनेश राईले नेपाली कांग्रेस धनकुटा जिल्ला कार्य समितिका सल्लाहकारहरुलाई मनोनयन गर्नु भएको पत्र समेत प्रदान गर्नु भएको थियो ।