धनकुटा । नेपाली कांग्रेस प्रदेश नं.१ कार्यसमितिले धनकुटा नगरपालिका सहित तीन नगरपालिकाको प्रमुखमा उम्मेदवार टुंगो लगाएको छ ।
नेपाली कांग्रेसका जिल्ला सभापति समेत रहेका दिनेश राईलाई धनकुटा नगरपालिकाको मेयरमा उम्मेदवारी दिने निर्णय गरेको छ । राई यस अघि पनि मेयरमा झिनो मतले पराजित भएका थिए ।
महालक्ष्मी नगरपालिकाको मेयरमा धुव्रराज राय, पाख्रिवास नगरपालिकाको मेयरमा ज्ञानवहादुर गुरुङलाई उम्मेदवार वनाउने टुंगो लागेको नेपाली कांग्रेस धनकुटाका प्रवक्ता खगेन्द्र घिमिरेले बताए । गुरुङ यस अघि उपमेयरका उम्मेदवार रहेका थिए । जिल्लाबाट सिफारिस भएको नामावलीलाई नेपाली कांग्रेस १ नं. प्रदेश कार्यसमितिले शनिवार टुंगो लगाएको हो ।
धनकुटा नगरपालिकाको मेयरका उम्मेदवार वनेका राई यसअघि २०७४ सालको स्थानीय तह निर्वाचनमा समेत उम्मेदवार वनेका थिए । त्यतिवेला उनी नेकपा एमालेका चिन्तन तामाङसँग १ सय १४ मतले पराजित भएका थिए । नेपाली कांग्रेस अन्य पालिकामा कम मतले उपविजेता भएको थियो ।
धनकुटा नगरपालिकामा उप्रमुख नेकपा माओवादिका गणेश विष्ट र महालक्ष्मीमा प्रेम खड्का र पाख्रिबासमा ओम निरौलामा उम्मेद्वार सिफारीस हुनसक्ने नेकपा माओवादिका संयोजक कमल राईले बताए । गठबन्धको अन्य पालिका भोली आईतबार टुँगो लागाउने नेपाली कांग्रेसका सचिव बिजयसन्तोषी राईले बताए ।