धनकुटा । यहि बैशाख ३० गते हुन गईरहेका स्थानीय तहको निर्वाचन नजिकिएसँग राजनीतिक दलहरुको कार्यक्रमले तीव्रता लिएको छ । यसैक्रममा गठबन्धन दलहरुले नगरका विभिन्न वडाहरुमा घरदैलो र कोणसभा कार्यक्रम गरिरहेका छन् । विभिन्न वडाको घरदैलो कार्यक्रमको क्रममा नगर प्रमुखका उम्मेदवार दिनेश राईले अरु कुरा बढी गर्छ हामीकाम गर्छौ भने ।
उनले २०७४ सालको स्थानीय तहको निर्वाचनमा एमालेले घोषणा पत्रमा गरेका अधिकांश जनताको हितमागर्नु पर्ने प्रतिवद्धता पुरा नगरेको आरोप लगाए ।
उम्मेदवार राईले हरेक वडामा औद्योगिक ग्राम बनाउँछु भनेकोमा कहाँ बनाए औद्योगिक ग्राम ? भनेर प्रश्न गरे । उनले नेपाली कांग्रेस सरकारको पालामा बनाईदिएको धनकुटा ६ स्थित औद्योगिक ग्राम पाँच वर्षमा सञ्चालनसमेत गर्न नसकेको आरोप लगाए ।
राईले धनकुटा अस्पतालमा पहिले ९ तहको डाक्टर रहदै आएकोेमा यो पाँच वर्ष निमित्तकै भरमा सञ्चालन भएको भन्दै यसैलाई विशेषज्ञ डाक्टरको सेवा मान्ने ? भनेर प्रश्न गरे । उनले सरकारले बनाईदिएको आईसीयू कक्ष सञ्चालनमा ल्याउन नसक्नेले अब फेरी धनकुटा नगरवासीलाई विशेषज्ञ डाक्टरसहितको अस्पताल बनाउने भनेर फेरी ढाटिरहेको आरोप लगाए । उनले हामी निर्वाचित भएको पहिलो आर्थिक वर्ष भित्रै मृगौला रोगीहरुको उपचारका लागि आवश्यक हुने डाईलोसिस निःशुल्क धनकुटामा नै गर्नेगरी डाईलोसिस सेन्टर सञ्चालन गर्ने प्रतिवद्धता जाहेर गरे । उनले निम्न आय भएका, एकल महिला, अपाङ्गहरुको निःशुल्क स्वास्थ्य वीमा गरिदिने व्यवस्था मिलाउने र हिलेमा नगर अस्पताल सञ्चालन गर्न पहल गरिने प्रतिवद्धता जनाए ।
यस्तै राईले एमालेको अघिल्लो घोषणापत्रमा उल्लेख गरेका धनकुटा क्याम्पसलाई शैक्षिक हव बनाउन विश्वविद्यालय बनाउने प्रतिवद्धता के भयो भनेर प्रश्न गरे । सो अवसरमा उनले अहिले पनि नगरवासी झुक्याउन अनेक प्रलोभन र आश्वासन बाडिरहेकाले सचेत हुन वडावासीलाई आग्रह गरे ।
राईले अरु कुरा गर्छन हामी काम गर्छौ भन्दै हामी निर्वाचित भए नगरका समस्त कृषकहरुलाई आवश्यक परेको समयमा तत्काल रकम निकाल्न मिल्ने गरी बैंकहरुसँग सहकार्यमा कृषक क्रेडिट कार्ड उपलब्ध गराउने र कृषि तथा पशु वीमा गरिदिने प्रतिवद्धता जनाए । यस्तै उनले ग्रामीण क्षेत्रमा पाँच हजार लिटर भन्दा कम पानी उपभोग गर्ने उपभोक्ताहरुको सम्पूर्ण शुल्क मिनाहा गर्ने बताए ।
सो अवसरमा राईले विद्यालयको स्तर हेरी दिवा खाजा, स्यानिटरी प्याडको व्यवस्थ ागर्ने बताए । यस्तै शिक्षकहरुलाई तालिम, बाहिर गएर उच्च शिक्षा लिनु पर्ने विद्यार्थीलाई शैक्षिक ऋण, छात्रबृत्ति, पुरस्कार तथा सम्मान गर्ने बताए ।
उम्मेदवार राईले याक्चाना त्रिवेणी सडकको स्तरोन्नति गरी आठपहरिया जातिका सहिद रिदिमाहाङ र सहिद रामालिहाङको सम्मानमा नामाकरण गरिने बताए । उनले नगरवासीलाइृ सहज आवातजावतका लागि नगर वस सञ्चालन गर्ने र सो बसमा ६० वर्ष नाघेका ज्येष्ठ नागरिकहरुलाई निःशुल्क गरिने जानकारी दिए ।
सो अवसरमा उप–प्रमुखका उम्मेदवार गणेश विष्टले नगरका एक घर एक रोजगार तथा स्वरोजगार कार्यक्रम सञ्चालन गरिने बताए । उनले यसका लागि निःशुल्क शीपमूलक तालिम, सहुलियत ऋण र वजारीकरणको व्यवस्था मिलाईने बताए ।
विष्टले बसाईसराई नियन्त्रण गर्न तथा आकर्षित गर्न गाउँ जाउ उद्यमी बनौं कार्यक्रम ल्याईने जानकारी दिए । उनले उद्यमीलाई सहुलियत व्याजमा ऋण, अनुदानको व्यवस्था गरिने साथै घरेलु उद्योग प्रवद्र्धन तथा बजारीकरणका लागि कोशेली घर स्थापना गरिने बताए ।
