धनकुटा । साँगुरीगढी गाउँपालिका वडा नं. ६ बाट वडासदस्यमा निर्वाचित सुरेशकुमार राई (गेसायाम्फू)ले आफ्नै मातृभाषामा सपथ ग्रहण गरेका छन् ।
शुक्रवार गाउँपालिकाको सभाहलमा नवनिर्वाचित अध्यक्ष जितेन्द्र राईबाट उनले मातृभाषा ‘याम्फू’ मा सपथ ग्रहण गरेका हुन् ।
सपथ ग्रहणको ढाँचालाई याम्फू भाषामा उल्था गरेर नवनिर्वाचित वडासदस्य राईले वाचन गरेका थिए ।
सपथ ग्रहण पछि याम्फू भाषामा सपथ लिन पाउँदा खुुुसी लागेको उनले प्रतिक्रिया दिए । उनका अनुसार पछिल्लो समय याम्फू समुदायमा रहेको भाषा, धर्म संस्कृतिहरु लोप हुन थालेका छन् । यो याम्फूहरुको मात्र नभएर सम्पूर्ण नेपालीहरुको, नेपाल राज्यको एउटा सम्पत्ति हो । यसलाई संरक्षण गर्नुपर्छ, बचाउनु पर्छ भन्ने लागेर आफ्नै मातृभाषामा सपथ लिएको उनको भनाई छ ।
गठवन्धनको तर्फबाट उम्मेदवार वनेका उनी वडा नंं. ६ को वडा सदस्य निर्वाचित हुँदा १ हजार ३ मत ल्याएर निर्वाचित भएका थिए ।
याम्फू किरात समाजका केन्द्रिय सचिव समेत रहेका उनी नेपाल आदिवासी जनजाति महासंघ धनकुटा समन्वय परिषद्का सहसचिव र जनता समाजवादी पाटी नेपाल (जसपा) को साँगुरीगढी गाउँपालिका सचिव समेत हुन् ।