धनकुटा । निर्वाहमुखी खेती प्रणालीलाई व्यवसायिक खेतीमा रुपान्तरण गर्ने उद्देश्य सहित साँगुरीगढी गाउँपालिका वडा नं. ५ डाँडाबजारमा एकदिने कृषि प्रदर्शनी मेलाको आयोजना गरिएको छ ।
‘कृषि, पर्यटन र पूर्वाधारको विकास, साँगुरीगढीको समृद्धिको आधार’ भन्ने मूल नाराका साथ ५ नं. वडा कार्यालयको आयोजनामा उक्त प्रर्दशनी मेलाको आयोजना भएको थियो ।
निर्वाहमुखी खेती प्रणालीलाई व्यावसायिक खेतीमा रुपान्तरण गर्नका लागि कृषकलाई पे्ररित गर्ने उद्देश्यले कृषि प्रदर्शनी मेलाको आयोजना गरिएको वडाध्यक्ष खड्ग थेगिम लिम्बूले वताए ।
साँगुरीगढी गाउँपालिकाका अध्यक्ष जितेन्द्र रुम्दाली राईको प्रमुख आतिथ्यमा सम्पन्न वृहत कृषि मेला प्रदर्शनीमा वोल्ने वक्ताहरुले निर्वाहमूखी र परम्परागत कृषि प्रणालीले किसानको जीवन स्तर नउठ्ने ठोकुवा गरेका छन् । उनीहरुले अवको कृषि क्रान्ति भनेको जबसम्म यान्त्रिकरण गर्न सकिन्दैन तवसम्म कृषि क्षेत्रमा आमूल परिवर्तन पनि नसकिने र किसानहरुलाई आत्मनिर्भर वनाउन पनि नसकिने वताए । गाउँपालिका अध्यक्ष रुम्दालीले भने–यस्ता खाले कृषि मेलाले गाउँगाउँमा खेतिपाती गरेर विविकापार्जन गरिहेका किसान दाजुभाई तथा दिदिवहिनीहरुलाई प्रोत्साहन मिल्ने वताए । उनले कृषि मेलालाई आगामी दिनमा पनि निरन्तरता दिन वडा कार्यालयलाई आग्रह गरे ।
कृषकको उत्पादनलाई विभिन्न विधामा राखेर पुरस्कारको लागि मूल्यांकन गरिएको थियो । कृषि उपजका विधाहरुमा नगदे बाली, तरकारी बाली, फलफूल बाली, खाद्यान्न बाली, दलहन बालीलाई छुट्टाछुट्टै रुपमा प्रदर्शनीमा थियो । प्रदर्शनीमा राखिएका कृषि सामग्रीको मुल्यांकन गरि प्रथम, दोस्रो, तेस्रो, चौथो र सान्त्वना स्थान हासिल गर्ने कृषकलाई पुरस्कृत गरिएको थियो । कृषि मेलाको उद्घाटन साँगुरीगढी गाउँपालिका अध्यक्ष जितेन्द्र रुम्दाली राईले गरेका थिए ।
गाउँ विकास कार्यक्रम सामुदायिक विकास कोषको समेत सथानिय व्यवस्थानमा सम्पन्न भएको कृषि मेला प्रदर्शनीमा तरकारी बाली १ सय ५२ प्रजाति, फफूल ५० प्रजाति, अन्नबाली १९ प्रजाति, मसला बाली २१ प्रजाति र दलहन बाली १६ प्रजातिका बालीहरु राखिएको थियो । गाउँ विकास कार्यक्रमका संयोजक भिमशंकर काफ्ले कृषि मेला प्रदर्शनीमा वडा भित्रका २ सय ५८ विभिन्न प्रजातिका ५ समुहका बालीहरु कृषकहरुले ल्याएको कृषि उपजका वस्तुहरु राखिएको वताए । कृषि प्रदर्शनीमा राखिएका उत्कृष्ठ कृषि उपजका वस्तुहरु ल्याएर सहभागिता जनाउने कृषिकहरुलाई नगद सहित पुरस्कृत समेत गरिएको थियो ।
प्रमाण पत्र सहित पुरस्कृत हुनेहरुमा अन्नवाली तर्फ प्रथम हुने सोवितमान देवान, दोश्रो हुने डिल्लिश्वर विश्वकर्मा, तेश्रो हुने दीलकुमारी लिम्वु र सान्तवना सीता घिमिरे रहेका छन् । त्यसैगरी तरकारी वाली तर्फ रामकुमारी राई प्रथम, लालमाया लिम्वु दोश्रो, सीता लिम्वु तेश्रो र नरवीर वि.क.ले सान्तवना पुरस्कार पाएका छन् । मसला वाली तर्फ विक्रिम लिम्वु प्रथम, रामकुमार याखा दोश्रो, दीपा राई तेश्रो र ताराहाङ लिम्वुले सान्तवना पाएका छन् ।
दलहन वाली तर्फ भद्रिका लिम्वु प्रथम, कविराज लिम्वु दोश्रो, खेमराज लिम्वु तेश्रो र नर्वदा लिम्वुले सान्तवना पुरस्कार पाएका छन् । त्यसैगरी फलफूल बाली तर्फ तारामाया याखा प्रथम, भीमराज लिम्वु दोश्रो, माला याखा तेश्रो र नरमाया लिम्वुले सान्तवना पुस्कार पाएका छन् ।
पुरस्कृत हुनेहरुलाई गाउँपालिका अध्यक्ष जितेन्द्र रुम्दाली राईले नगद सहित प्रमाणपत्र प्रदान गरेका छन् । हरेक विद्यामा प्रथम, द्धितिय, तृतिय र सान्तवना हुनेलाई जनही १५ सय, १२ सय, ८ सय र ५ नगद सहित प्रमाणपत्र प्रदान गरिएको थियो । प्रतियोगितामा सहभागी साविकको ९ वटै वडाबाट सहभागी प्रतियोगितामा सामेल नभएका उत्कृष्ठ २३ जना कृषकहरुलाई पनि सो कार्यक्रममा नगद १ हजार, ५ सयका दरले पुरस्कृत गरिएको थियो । वितरण गरिएको नगद पुरस्कारमा अनविार्य १३ प्रतिसत भ्याट कट्टा गरिएको आयोजकले जनाएको छ ।
