धनकुटा । साँगुरीगढी गाउँपालिकाले प्राथमिक स्वास्थ्य केन्द्र डाँडाबजारलाई एम्वुलेन्स हस्तान्तरण गरेको छ ।
स्वास्थ्य केन्द्रको प्राङ्गणमा आइतवार आयोजित एक कार्यक्रमका वीच साँगुरीगढी गाउँपालिका अध्यक्ष जितेन्द्र राईले एम्वुलेन्सको चावी साँगुरीगढी गाउँपालिका वडा नं. ५ का वडाध्यक्ष तथा स्थानीय स्वास्थ्य समन्वय समितिका अध्यक्ष खड्क लिम्बुलाई हस्तान्तरण गरे ।
हस्तान्तरण कार्यक्रममा वोल्दै गाउँपालिका अध्यक्ष राईले पालिकाभरिका नागरिकलाई उपचारका लागि स्वास्थ्य संस्था आइपुग्न सहज होस् भन्ने उद्देश्यले एम्वुलेन्स खरिद गरि स्वास्थ्य चौकीलाई प्रदान गरिएको बताए । उनका अनुसार एम्वुलेन्स नहुँदा विरामीलाई उपचारका लागि स्वास्थ्य संस्था आइपुग्न कठिन थियो । कतिपय विरामीहरु घरमै वस्नु पर्ने वाध्यता थियो । तर ती सबै वाध्यता हटेर एम्वुलेन्सबाट स्वास्थ्य संस्था छिटो पुगेर सहज उपचार पाउने उनले दावी गरे । “साँगुरीगढीको हरेक नागरिकको स्वास्थ्यमा हाम्रो जिम्मेवारी” भन्ने अभियानमा निर्वाचित जनप्रतिनिधि रहेको भन्दै स्थानीय सरकारले स्वास्थ्यमा थप सेवा उपलब्ध गराउन पाएकोमा उनले खुसी व्यक्त गरे ।
एम्वुलेन्स गाउँपालिकाको बजेटबाट नेपाल सरकारको राजश्व छुट मार्फत खरिद गरिएको स्वास्थ्य शाखा प्रमुख गणेश यादवले बताए । उनका अनुसार राजश्व छुट बाहेक एम्वुलेन्स लागत १८ लाख ५९ हजार ४ सय ३ रुपैयामा खरिद गरिएको हो ।
सोही अवसरमा पालिका अध्यक्ष जितेन्द्र राईले करिव २० लाख रुपैया वरावरको भिडियो एक्स–रे (युएसजी मेसिन) मेसिन प्राथमिक स्वास्थ्य केन्द्रलाई हस्तान्तरण गरे ।
गतभदौंमा अध्यक्ष राईले स्वास्थ्य मन्त्री भवानी खापुङलाई मन्त्रालय पुगेर भेट गरि प्राथमिक स्वास्थ्य केन्द्र डाँडा बजारका लागि भिडियो एक्स–रे मेसिन उपलब्ध बारे माग पत्र वुझाएका थिए । सोही अनुरुप स्वास्थ्य केन्द्रमा भिडियो एक्सरे मेसिन मन्त्रालयबाट उपलब्ध भएको अध्यक्ष राईले बताए ।
कार्यक्रममा निवर्तमान पालिका अध्यक्ष कुमारजंग याखा, पालिका स्वास्थ्य शाखा प्रमुख गणेश यादव तथा स्थानीय राजनीतिक दलका प्रतिनिधि र स्थानीय वासिन्दाको सहभागीता रहेको थियो ।
