धनकुटा । साँगुरीगढी गाउँपालिका वडा नं. ४ लेउतीटारमा रहेको राम माध्यमिक विद्यालयले ४८ औं वार्षिकत्सव मनाएको छ । शुक्रवार विविध कार्यक्रमको आयोजना गरि विद्यालयले आफ्नो ४८ औं वार्षिकत्सव बनाएको हो ।
सो विद्यालय २०३२ साल पुस १५ गते स्थापना भएको हो । स्थापनाको सोही दिनलाई विद्यालयले वार्षिकत्सवको रुपमा मनाउँदै आइरहेको छ ।
वार्षिकत्सवको औपचारिक उद्घाटन कार्यक्रमका प्रमुख अतिथि साँगुरीगढी गाउँपालिका अध्यक्ष जितेन्द्र राईले गरेका थिए । कार्यक्रममा मन्तव्य राख्दै प्रमुख अतिथि राईले साँगुरीगढी गाउँपालिका भरिको गुणस्तरीय शिक्षाका लागि पालिका प्रतिवद्ध रहेको बताए । उनले विद्यार्थीको शैक्षिक गुणस्तरमा सहयोग पुगोस् भन्ने उद्देश्यले दिवा खाजा कार्यक्रममा गाउँपालिकाको तर्फबाट केही वजेट विनियोजन गरिएको बताए । उनले राम माध्यमिक विद्यालयको भवन रहेको क्षेत्र लेउती खोलाले कटान गरिरहेको हुँदा भूसंरक्षण नियन्त्रणको लागि ग्याविन वाल लगाउने कार्य गर्ने समेत बताए । उनले सोही अवसरमा विद्यालयमा सभाहल निर्माणको लागि पहल गर्ने समेत प्रतिवद्धता व्यक्त गरे ।
कार्यक्रमका विशेष अतिथि गाउँपालिका उपाध्यक्ष मुना राई, वडा नं. ४ का वडाध्यक्ष जीवनकुमार लिम्बु लगायतले शुभकामना मन्तव्य राखेका थिए । विद्यालय व्यवस्थापन समितिका अधयक्ष मातृका प्रसाद लिम्बुको अध्यक्षतामा सम्पन्न कार्यक्रममा स्वागत मन्तव्य सहायक प्रधानाध्यापक गुरुप्रसाद लिम्बु र संचालन शिक्षक दुर्गाप्रसाद रिजालले गरेका थिए ।
विद्यालयका प्रधानाध्यापक कुलप्रसाद दाहालले विद्यालयको वार्षिक प्रतिवेदन प्रस्तुत गरेका थिए । सोही अवसरमा विद्यालय व्यवस्थापन समितिका पूर्वअध्यक्ष असल लिम्बुलाई सम्मान गरिएको थियो । त्यस्तै १६ जना शिक्षक र २ जना कर्मचारीलाई पनि साेही अवसरमा सम्मान तथा पुरस्कृत गरिएको थियो ।
कार्यक्रममा विद्यालयमा अध्ययरत विद्यार्थीहरुले साँस्कृतिक कार्यक्रम प्रस्तुत गरेका थिए । त्यस्तै वार्षिकत्सवको अवसरमा आयोजित विविध खेलकुद प्रतियोगिताका विजयी विद्यार्थीहरुलाई पनि पुरस्कृत गरिएको थियो ।