धनकुटा । भूमि व्यवस्था सहकारी तथा गरिबी निवारण मन्त्रालयले सूचिकृत गरेको घरधुरीलाई साँगुरीगढी गाउँपालिकाले गरिव परिचय पत्र वितरण सुरु गरेको छ ।
वडा नंं ७ को वडा कार्यालयमा आयोजित एक कार्यक्रमा गाउँपालिका अध्यक्ष जितेन्द्र राई, उपाध्यक्ष मुना राई, प्रमुख प्रशासकीय अधिकृत मनोजकुमार ठाकुर लगायत कर्मचारीहरुको टोलीले संयुक्त रुपमा परिचयपत्र वितरण गरेका थिए ।
अन्य वडामा कर्मचारीको टोलिले परिचय पत्र वितरण गरिरहेका छन् ।
साँगुरीगढी गाउँपालिका भरि गरिव परिवारमा सूचिकृतको संख्या ३ सय ६५ रहेको छ । परिचय पत्रलाई तीन प्रकारमा विभाजन गरिएको छ । हरेक परिचय पत्रको रंग वेग्ला वेग्लै रहेको छ । अति गरिव परिचय पत्रको रंग रातो, मध्यम गरिव परिचय पत्रको रंग पहेलो र सामान्य गरिव परिचय पत्रको रंग निलो रहेको छ ।
यस पालिकामा अति गरिवमा सुचिकृत परिवारको संख्या ६७, मध्यम गरिव परिवारमा सुचिकृत १ सय ६२ र सामान्य गरिव परिवारमा सूचिकृत १ सय ३६ जना रहेका छन् । परिचय पत्रको समयवधि ५ वर्षको रहेको छ । तर परिचयपत्र पाएकाहरुले सरकारबाट पाउने सुविधा के हुने भन्ने स्पट छैन ।