धनकुटा । साँगुरीगढी गाउँपालिकामा प्रारम्भिक पहिचान सम्वन्धी दुई दिने पुनर्ताजगी तालिम सम्पन्न भएको छ । साँगुरीगढी गाउँपालिका शिक्षा, यूवा तथा खेलकुद शाखाको आयोजनामा पालिका स्थित सभाहलमा उक्त तालिम संचालन भएको हो ।
पुस २२ र २३ गते गरि दुईसम्म संचालन भएको तालिममा पालिका भरिका ४९ सामुदायिक विद्यालयका एक÷एक जना प्रतिनिधित्व हुने गरि प्रधानाध्यापक तथा शिक्षकको सहभागिता रहेको थियो ।
तालिमको सहजीकरण हुसाडेक नेपालको तर्फबाट सहजकर्ता चन्द्र थापाले गरेका थिए । उनले प्रारम्भिक पहिचानको परिभाषा, किन प्रारम्भिक पहिचान महत्वपूर्ण छ, पहिचान गर्ने प्रक्रिया वा विधि, प्रारम्भिक पहिचान गर्दा ध्यान दिनु पर्ने कुराहरु लगायतका विषयमा सहजीकरण गरेका थिए ।
समापन कार्यक्रमका प्रमुख अतिथि जितेन्द्र राईले तालिममा सहभागी भएका प्रधानाध्यापक तथा शिक्षकहरुलाई प्रमाण वितरण गरेका थिए । कार्यक्रममा वोल्दै अध्यक्ष राईले तालिमले शिक्षकहरुलाई वालवालिकाहरुको प्रारम्भिक पहिचान गरि उनीहरुलाई सहज तरिकाले कसरी पठनपाठन गर्न सकिन्छ भन्ने विषयमा सहयोगी भूमिका निर्वाह गरेको बताए ।
समापन कार्यक्रमको संचालन शिक्षा, यूवा तथा खेलकुद शाखा प्रमुख गंगा कटुवाल र राम प्राथमिक विद्यालयका शिक्षक ध्रुव घिमिरेको अध्यक्षतामा सम्पन्न भएको थियो । समापन कार्यक्रममा साँगुरीगढी गाउँपालिका वडा नं. ६ का वडाध्यक्ष दिपक मगर, गाउँपालिकाका योजना शाखा प्रमुख ज्ञानवहादुर राई लगायतको सहभागिता थियो ।
तालिममा सहभागीको तर्फबाट साँगुरीगढी गाउँपालिका वडा नं. ६ नाम्जेस्थित ग्रामीण जनता माध्यमिक विद्यालयका प्रधानाध्यापक टंक भूजेल र साँगुरीगढी गाउँपालिका वडा नं. ७ स्थित लोकप्रिय प्राथमिक विद्यालयकी प्रधानाध्यापक विनाश्वरी राईले मन्तव्य राखेकी थिइन् ।