धनकुटा । महालक्ष्मी नगरपालिका वडा नं. ३ डाँडा गाउँमा पहिलो पटक एकदिने वाली उपचार शिविरको आयोजना गरिएको छ । कृषि ज्ञान केन्द्र धनकुटाको आयोजना तथा महालक्ष्मी नगरपालिका कृषि शाखाको समन्वयमा उक्त शिविर सम्पन्न भएको थियो ।
शिविरमा डाँडागाउँ क्षेत्रमा ४० भन्दा बढी कृषकहरुले रोग किरा लागेका विरुवाको नमूनाहरु ल्याएर परिक्षण गराएका थिए । शिविरमा गरिएको परिक्षणमा काउली वन्दाकोभीमा क्लव रुट (जरा गाँठो हुने ) रोग साथै सुन्तला जातका फलफुलमा विभिन्न किराहरुको संक्रमण देखिएको थियो । जसको उपचार विधि र आवश्यक जैविक विषादी निःशुल्क वितरण गरिएको थियो ।
कार्यक्रममा कृषि ज्ञान केन्द्र धनकुटाका अधिकृतस्तर छैटौं कर्णध्वज भूजेल, वाली संरक्षण अधिकृत सुरज खनाल, कृषि विज्ञ सूर्यप्रसाद सापकोटा, महालक्ष्मी नगरपालिका कृषि शाखा प्रमुख दिलकुमारी राई, कृषि प्राविधिक शेखर चापागाईं लगायतको उपस्थिति थियो ।
यहाँका किसानले खेति गरेको वालीमा रोगकिराको व्यापक संक्रमण देखिएकोले आयोजना गरिको महालक्ष्मी नपा वडा नं. ३ का वडाध्यक्ष रामचन्द्र थापाले बताए ।
साथै सोही दिन कृषि ज्ञान धनकटाकै आयोजनामा आमाहरुलाई विषादी रहित पोषणयुक्त खानेकुरा सम्वन्धी एक दिने सचेतनामूलक कार्यक्रम पनि सम्पन्न भएको थियो । उक्त सचेतनामूलक कार्यक्रममा कृषि प्राविधिक शेखर चापागाईंले पोषणको विषयमा र वाली संरक्षण अधिकृत सुरज खनालले विषादी रहित खानेकुराको विषयमा सहजीकरण गरेका थिए ।