धनकुटा । साँगुरीगढी गाउँपालिका वडा नं. १ तेम्वाङ गाउँमा प्रथम तेम्वाङ खुल्ला नकआउट फुटवल प्रतियोगिता सुरु भएको छ माघेसंक्रान्तिको अवसर पारेर स्थानीय तेम्वाङ फुटवल क्लवले पहिलो पटक फुटवल प्रतियोगिताको आयोजना गरेको हो ।
प्रतियोगिताको उद्घाटन प्रमुख अतिथि साँगुरीगढी गाउँपालिका अध्यक्ष जितेन्द्र राईले गरेका थिए । उनले खेलका रेफ्रिलाई फुटबल हस्तान्तरण गर्दै उद्घाटन गरे । उद्घाटन कार्यक्रमलाई सम्वोधन गर्दै गाउँपालिका अध्यक्ष राईले पालिकाको विभिन्न क्षेत्रमा हुने खेलकुद गतिविधिलाई प्रोत्साहन गर्न सहयोग गरिरहेको बताए । ग्रामीण क्षेत्रमा रहेका प्रतिभावान खेलाडीलाई राष्ट्रियस्तरसम्म पुर्याउन यस्ता प्रतियोगिताले सहयोग पुग्ने विश्वास उनले व्यक्त गरे ।
उद्घाटन कार्यक्रमको विशेष अतिथि साँगुरीगढी गाउँपालिका वडा नं. १ का वडाध्यक्ष गोविन्द लिम्बु थिए । क्लवका अध्यक्ष नविन राईको अध्यक्षतामा सम्पन्न उद्घाटन कार्यक्रमको संचालन गिता लिम्बुले गरेकी थिइन् ।
प्रतियोगितामा आयोजकका दुई टिम गरि विभिन्न क्षेत्रका २८ वटा टिमको सहभागीता रहेको छ । प्रतियोगिता आगामी माघ ८ गतेसम्म संचालन हुनेछ ।
उद्घाटनको दिन सम्पन्न पहिलो खेलमा आयोजक तेम्वाङ निलो टिमलाई ट्राइब्रेकरमा पराजित गर्दै पिजीवाइसीले विजयी सुरुवात गरेको छ । निर्धारित समयको खेल गोलरहित वरावरीमा टुंगिएपछि खेल ट्राइब्रेकरसम्म पुगेको थियो । ट्राइब्रेकरमा आयोजकलाई पिजीवाइसीले ४ का विरुद्ध ५ गोलअन्तरले पराजित गरेको थिषे ।
त्यस्तै आजै सम्पन्न दोस्रो खेलमा तुम्वारी फुटवल क्लवलाई शुन्यका विरुद्ध एक गोलले पराजित गर्दै वेलका–८ उदयपुर विजयी भएको छ ।
तेस्रो खेल साँगुरीगढी–६ भेडेटार र सिम्सुवा फुटवल क्लव वीच खेल तालिम भएपनि भेडेटार अनुपस्थित हुँदा सिम्सुवा फुटवल क्लवलाई विजेता घोषणा गरिएको क्लवका संयोजक मनिन्द्र राईले बताए । दुई टिम वीचको खेलमा सिम्सुवा फुटवल क्लव मात्रै मैदानमा उपस्थित भएको थियो ।
प्रतियोगिताको विजेताले नगद ५१ हजार १ सय ११ रुपैया सहित ट्रफ्री र प्रमाण र उपविजेताले नगद ३१ हजार १ सय ११ रुपैया सहित ट्रफ्री र प्रमाणपत्र हात पार्नेछन् । गोर्खा वियर, क्वालिटी विस्कुट र जिस्टोर प्रायोजक रहेको प्रतियोगिताको सहयोेगीहरुमा तेजमान साम्पाङ राई, हरि साम्पाङ राई, रत्न लिम्बु, भुपेन्द्र राई र मोहन वान्तवा राई रहेका छन् । साइबररोस प्राविधिक सहयोगीको रुपमा रहेको छ ।