धनकुटा । साँगुरीगढी गाउँपालिका वडा नं ८ को ढुङ्गेदेखि वडा नंं ९ को ठुटेबरसम्म जोड्ने सडक स्तरोन्नतिको काम धमाधम भइरहेको छ ।सोमवार साँगुरीगढी गाउँपालिका अध्यक्ष जितेन्द्र राई नेतृत्वको टोलीले स्थलगत रुपमा पुगेर निर्माणाधिन् सडकको निरीक्षण गरेको थियो ।
सडकको स्तरोन्नतिको काम सन्तोषजनक भइरहेको अध्यक्ष राईले बताए । काम सम्पन्न भइसकेपछि वाह्रैमास सहज तरिकाले सो सडकमा सवारी आवतजावत हुने उनको भनाई छ ।
प्रदेश सरकारको प्रदेश पूर्वाधार योजना अन्र्तगत सडकको स्तरोन्नति भइरहेको हो । करिव ५० लाख रुपैया विनियोजन भए पनि ३४ लाख रुपैयामा विसी कन्स्ट्रक्शनले ठेक्का पाएको हो ।
करिव ३ किलोमिटर सडकको विभिन्न ठाउँमा ग्याविन, वाल लगाउने कार्य र ५ मिटर सडक चौडाहा गर्ने काम भइरहेको निर्माण व्यवसायी केदार कोइरालाले बताए । गत पुस १८ गते ठेक्का लागेको योजनाको म्याद आगामी २०८० को जेष्ठ मसान्तसम्म रहेको छ । अध्यक्ष नेतृत्वको निरिक्षण टोलीमा ८ नं. वडाका वडा सदस्य पंचवहादुर विश्वकर्मा सहित स्थानीय उपभोक्ताहरुको सहभागिता रहेको थियो ।