धनकुटा । प्रथम तेम्वाङ खुल्ला नकआउट फुटवल प्रतियोगिताको उपाधी माङदुवा फुटवल क्लवले हात पारेको छ । आइतवार सम्पन्न फाइनल खेलमा आयोजक तेम्वाङ रातोलाई शुन्यका विरुद्ध एक गोलले पराजित गर्दै साँगुरीगढी गाउँपालिका वडा नं. २ वुढिमोरङको माङदुवा फुटवल क्लवले उपाधी हात पारेको हो ।
उपाधी ट्रफीसँगै माङदुवा एफसीले नगद ५१ हजार १ सय ११ रुपैया हात पार्न सफल भयो । उपविजेतामा सिमित आयोजक तेम्वाङ रातोले नगद ३१ हजार १ सय ११ रुपैयामा चित्त वुझायो ।
विजयी टिमका लागि एक मात्र निर्णायक गोल मिलन लिम्बुले गरेका थिए । उनले खेलको ५१ मिनेटमा पाएको पेनाल्टीलाई सदुप्रयोग गर्दै गोल गरेका थिए । उनले गरेको गोल नै विजेता हुन माङदुवाको लागि निर्णायक सावित भइदियो ।
फाइनल खेलको म्यान अफ द म्याच तेम्वाङका पासाङ लामा घोषित भए । प्रतियोगिताको सर्वोत्कृष्ट खेलाडी बन्दै उपविजेता टिमका पासाङले नगद ५ हजार सहित ट्रफी हात पारे । त्यस्तै माङदुवाका रिजत तुम्वाफु उत्कृष्ट गोलकिपर घोषित भए । उनले नगद ३ हजार सँगै ट्रफी हात पारे । प्रतियोगिता भर ४ गोल गरि सर्वाधिक गोलकर्ताको पुरस्कार माङदुवाका मिलन लिम्बुले प्राप्त गरे । उनले नगद ५ हजार प्राप्त गरे ।
विजेता टिमलाई कार्यक्रमका प्रमुख अतिथि साँगुरीगढी गाउँपालिका अध्यक्ष जितेन्द्र राईले पुरस्कार वितरण गरेका थिए । उपविजेता टिमलाई तेम्वाङ प्राथमिक विद्यालयकी शिक्षिका भविता राईले प्रदान गरेकी थिइन् ।
साँगुरीगढी गाउँपालिका वडा नं. १ तेम्वाङ गाउँमा गत माघ १ गतेदेखि प्रथम तेम्वाङ खुल्ला नकआउट फुटवल प्रतियोगिता सुरु भएको थियो । माघेसंक्रान्तिको अवसर पारेर स्थानीय तेम्वाङ फुटवल क्लवले पहिलो पटक फुटवल प्रतियोगिताको आयोजना गरेको क्लवका अध्यक्ष नविन राईले बताए ।
प्रतियोगितामा आयोजकका दुई टिम गरि विभिन्न क्षेत्रका २८ वटा टिमको सहभागीता रहेको थियो । गोर्खा स्ट्रङ्ग, क्वालिटी विस्कुट र जिस्टोर प्रायोजक रहेको प्रतियोगिताको सहयोेगीहरुमा तेजमान साम्पाङ राई, हरि साम्पाङ राई, रत्न लिम्बु, भुपेन्द्र राई र मोहन वान्तवा राई रहेका छन् । साइबररोस प्राविधिक सहयोगीको रुपमा रहेको थियो ।