धनकुटा । साँगुरीगढी गाउँपालिका वडा नं. ३ कुसेटारमा आजदेखि चौथो सरस्वती कप नकआउट फुटवल प्रतियोगिता सुरु भएको छ । स्थानीय ड्रिम बोइज फुटवल क्लवको आयोजनामा फुटवल प्रतियोगिता सुरु भएको हो । एक कार्यक्रमका वीच साँगुरीगढी गाउँपालिका वडा नंं ३ का वडाध्यक्ष टेकप्रसाद लिम्बुले रेफ्रि तुफान चेम्जोङलाई वल हस्तान्तरण गर्दै प्रतियोगिताको उद्घाटन गरेका थिए ।
प्रतियोगिताको पहिलो दिन आज ४ वटा खेल सम्पन्न भएको आयोजक ड्रिम बोइज फुटवल क्लवका अध्यक्ष नविन माझीले बताए । पहिलो खेलमा तेम्वाङ फुटवल क्लवलाई पेनाल्टी सुटआउटमा पराजित गर्दै तुङ्खा फुटवल क्लवले विजयी सुरुवात गरेको छ । निर्धारित समयभित्र दुवै टिमले २÷२ गोल गर्दै खेल वरावरी बनाएपछि पेनाल्टी सुटआउटमा धकेलिएको थियो । पेनाल्टी सुटआउटमा तुङ्खाले तेम्वाङलाई ६–७ गोलअन्तरले पराजित गर्दै अघिल्लो चरणमा प्रवेश गरेको छ ।
त्यस्तै दोस्रो खेलमा याङ्लिखा फुटवल क्बललाई शुन्यका विरुद्ध ३ गोल अन्तरले पराजित गर्दै मुलघाट फुटवल क्लव तमरले पनि विजयी सुरुवात गर्दै अघिल्लो चरणमा प्रवेश गरेको छ । तेस्रो खेलमा मादेन फुटवल क्लवलाई शुन्यका विरुद्ध १ गोलअन्तरले पराजित गर्दै द राइजिङ युथ क्लव विजयी भयो ।
त्यस्तै चौथो खेलमा साविक विजेता रोयल छथर तेह्रथुमलाई शुन्यका विरुद्ध २ गोलअन्तरले पराजित गर्दै तिलिगाउँ फुटवल क्लवले विजयी
सुरुवात गरेको छ । अघिल्लो संस्करणको विजेता रोयल छथर पहिलो खेलमा तिलिगाउँसँग पराजित हुँदै घर फर्किन वाध्य भयो ।
प्रतियोगितामा धनकुटा सहित तेह्रथुम र सुनसरीको गरी २३ वटा टिमको सहभागिता छ । प्रतियोगिताको विजेताले नगद ५० हजार सहित ट्रफी र प्रमाण पत्र प्राप्त गर्नेछ । त्यस्तै उपविजेता टिमले नगद ३० हजार सहित ट्रफी र प्रमाण पत्र प्राप्त गर्नेछ । विगतको संस्करण भन्दा यो पटक पुरस्कार राशिमा वृद्धि गरिएको अध्यक्ष माझीले बताए । गतवर्ष विजेतालाई ४० र उपविजेतालाई २५ हजार रुपैया प्रदान गरिएको थियो । प्रतियोगितामा विधागत रुपमा उत्कृष्ट हुने खेलाडीलाई पुरस्कारको व्यवस्था पनि गरिएको छ ।
श्रीपंञ्चमीको बेला कुसेटार लाग्दै आइरहेको सरस्वती बजारको अवसर पारेर विगत ४ वर्षदेखि प्रतियोगिता संचालन हुँदै आइरहेको आयोजकले जानकारी दिएको छ । प्रतियोगिता संचालन गर्नको लागि साँगुरीगढी गाउँपालिका र ३ नं वडा कार्यालयले पनि सहयोग गरेको छ । त्यस्तै स्थानीय वासिन्दा तथा कुसेटार घर भई रोजगारीको सिलसिलामा देश तथा विदेशमा रहेका व्यक्तिहरुवाट पनि सहयोग प्राप्त भइरहेको आयोजकले जानकारी दिएको छ । २५ गतेसम्म कुसेटारको खेल मैदानमा प्रतियोगिता संचालन भइरहेको छ ।
