धनकुटा । साँगुरीगढी गाउँपालिका वडा नं. ३ कुसेटारमा जारि चौथो सरस्वती कप नकआउट फुटवल प्रतियोगिता अन्र्तगत शनिवार पहिलो चरणका चार खेल सम्पन्न भए ।
शनिवार सम्पन्न पहिलो खेलमा साप्तिङ फुटवल क्लवलाई ४–१ गोलअन्तरले पराजित गर्दै आयोजक निलो दोस्रो चरणमा प्रवेश गरेको छ । आयोजकको जितमा कप्तान नविन माझीले तीन गोल गर्दै ह्याट्रिक पुरा गरे । एक गोल विपक्षी टिमबाट उपहार पाएको थियो । साप्तिङले एक गोल मात्रै फर्काउन सफल भयो ।
त्यस्तै दोस्रो खेलमा सुनसरीको विशेष सुरक्षा गणलाई पेनाल्टी सुटआउटमा पराजित गर्दै सदाम फुटवल क्लव विजयी भयो । आजको खेल जित्दै सदाम पनि दोस्रो चरणमा प्रवेश गरेको छ । खेलको निर्धारित समयभित्र दुवै टोलीको शुन्य गोल भएपछि खेल वरावरीमा टुंगिएको थियो । पेनाल्टी सुटआउटमा सदाम ४–३ गोलअन्तरले विजयी भएको थियो ।
तेस्रो खेलमा दानावारी फुटवल क्लव र वेशीटोल फुटवल क्लव वीच भएको थियो । उक्त खेलमा वेशीटोललाई २–१ गोलअन्तरले पराजित गर्दै दानावारी विजयी भयो ।
चौथो खेलमा आयोजित रातो नेट वलबाट विजयी घोषित भयो । आयोजक रातोको प्रतिद्वन्दी कलेक्सन निर्धारित समय भन्दा ढिलो खेल मैदानमा आइपुग्दा नेट वलको आधारमा आयोजक रातोलाई विजय घोषणा गरिएको थियो । भोली आइतवार प्रतियोगिता अन्र्तगत पहिलो चरणको तीन खेल र दोस्रो चरणको एउटा खेल हुने आयोजकले जानकारी दिएको छ ।
धनकुटा सहित तेह्रथुम र सुनसरीको गरी २३ वटा टिमको सहभागिता रहेको प्रतियोगिताको विजेताले नगद ५० हजार सहित ट्रफी र प्रमाण पत्र प्राप्त गर्नेछ । त्यस्तै उपविजेता टिमले नगद ३० हजार सहित ट्रफी र प्रमाण पत्र प्राप्त गर्नेछ । विगतको संस्करण भन्दा यो पटक पुरस्कार राशिमा वृद्धि गरिएको अध्यक्ष नविन माझीले बताए । गतवर्ष विजेतालाई ४० र उपविजेतालाई २५ हजार रुपैया प्रदान गरिएको थियो । प्रतियोगितामा विधागत रुपमा उत्कृष्ट हुने खेलाडीलाई पुरस्कारको व्यवस्था पनि गरिएको छ ।
श्रीपंञ्चमीको बेला कुसेटार लाग्दै आइरहेको सरस्वती बजारको अवसर पारेर विगत ४ वर्षदेखि प्रतियोगिता संचालन हुँदै आइरहेको आयोजकले जानकारी दिएको छ । प्रतियोगिता संचालन गर्नको लागि साँगुरीगढी गाउँपालिका र ३ नं वडा कार्यालयले पनि सहयोग गरेको छ । त्यस्तै स्थानीय वासिन्दा तथा कुसेटार घर भई रोजगारीको सिलसिलामा देश तथा विदेशमा रहेका व्यक्तिहरुवाट पनि सहयोग प्राप्त भइरहेको आयोजकले जानकारी दिएको छ । २५ गतेसम्म कुसेटारको खेल मैदानमा प्रतियोगिता संचालन भइरहेको छ ।
