धनकुटा । तेह्रौं राष्ट्रपति रनिङ्ग शिल्ड तथा पाँचौं साँगुरीगढी गाउँपालिका स्तरीय प्रतियोगिता सुरु भएको छ । साँगुरीगढी गाउँपालिकाको प्रायोजन तथा रामनवमी माध्यमिक विद्यालय वुढिमोरङको आयोजनामा उक्त प्रतियोगिता सुरु भएको हो ।
प्रतियोगिताको उद्घाटन प्रमुख अतिथि साँगुरीगढी गाउँपालिका अध्यक्ष जितेन्द्र राईले गरेका थिए । उद्घाटन कार्यक्रमलाई सम्वोधन गर्दै गाउँपालिका अध्यक्ष राईले खेलकुदको माध्यमबाट आफ्नो विद्यालय र गाँउपालिकाको परिचित हुने भएकोले सहभागी सबै खेलाडीहरुले अनुशासित भएर खेल्दै विजयी हुन शुभकामना दिएका थिए । साथै उनले खेलकुदबाट पनि युवाहरुले आफ्नो भविष्य बनाउन सकिने भएकाले आगामी बर्षहरुमा पालिकाले विशेष खेलकुदमा बजेटको व्यवस्था गर्ने बताए । उनले यसको सुरुवात चालु आर्थिक वर्षबाट भइसकेको बताए । पालिका स्तरीय खेलकुद प्रतियोगितालाई जोड दिइएको बताउँदै ब्याडमिन्टन प्रतियोगिताको लागि २ लाख ५० हजार, भलिवल प्रतियोगिताको लागि ४ लाख र फुटवल प्रतियोगिताको लागि ६ लाख रुपैया बजेट विनियोजन गरेको गाउँपालिका अध्यक्ष राईको भनाई थियो ।
८ वटा माध्यमिक विद्यालय र ४ वटा निम्न माध्यमिक विद्यालय गरी १२ वटा विद्यालयको सहभागिता रहेको प्रतियोगितामा १ सय, २ सय, ४ सय, ८ सय, १५ सय, ३ हजार मिटरको दौड, रिले दौड, भलिवल, कवड्डी, हाइजम्प, लङजम्प लगायत विधामा प्रतिस्पर्धा हुने रामनवमी माध्यमिक विद्यालयका प्रधानाध्यापक शिव इङनामले बताए ।
उनका अनुसार प्रतियोगिता तेह्रौ राष्ट्रपति रनिङ शिल्ड अन्र्तगत आयोजना भएको हो । पालिकास्तरको हरेक विधामा प्रथम स्थान हासिल गर्ने खेलाडीले गाउँपालिकाको तर्फबाट जिल्ला स्तरको राष्ट्रपति रनिङ शिल्ड प्रतियोगितामा सहभागी जनाउनेछन् ।
पालिका स्तरको रनिङ शिल्ड प्रतियोगिताको साविक विजेता डाँडाबजारको भानु माध्यमिक विद्यालय हो । गत वर्ष साँगुरीगढी गाउँपालिका वडा नं. ३ स्थित जलकन्या माध्यमिक विद्यालय वेंशीटोलले प्रतियोगिताको आयोजना गरेको थियो ।
यो पटक आयोजक रामनवमी मा.वि. सहित गतवर्षको विजेता भानु मा.वि., ग्रामीण जनता मा.वि., जलकन्या मा.वि., सितादेवी मा.वि., राम मा.वि., गोलखाडी मा.वि., लक्ष्मी मा.वि., सिंहकाली नि. मा.वि., भानुभक्त नि. मा.वि., फाक्सिव नि. मा.वि., तानन्छोप्पा वोर्डिङ स्कुल लगायत विद्यालयहरुले प्रतियोगितामा सहभागिता जनाएका छन् ।
सोही अवसरमा रामनवमी विद्यालयका खेलाडीहरुका लागि १०/१० थान जर्सी सौजन्य गर्ने साँगुरीगढी गा.पा.२ बुढिमोङ निवासी पुरन इवाहाङ लिम्बू, चन्द्रकुमारी नयोङ (इङनाम) लाई धन्यवाद पत्र प्रदान गरिएको थियो । उक्त धन्यवाद पत्र प्रमुख अतिथि गाउँपालिका अध्यक्ष जितेन्द्र राईले प्रदान गरेका थिए ।
उद्घाटन कार्यक्रमको अध्यक्षता आयोजक रामनवमी मा.वि.का विद्यालय व्यवस्थापन समितिका अध्यक्ष बह्मध्वज लिम्बुले गरेका थिए । भने कार्यक्रममा स्वागत मन्तव्य विद्यालयका प्रधानाध्यापक शिव इङनाम, संचालन विद्यालयका शिक्षक रिजन श्रेष्ठले गरेका थिए ।
प्रतियोगिता भोली माघ २५ गते वुधवार सम्म संचालन हुनेछ ।