धनकुटा । धनकुटामा जारि तेस्रो सहिद रामकृष्ण श्रेष्ठ अन्तर पालिका महिला फुटवल प्रतियोगिताको उपाधी धनकुटा नगरपालिकाको महिला टिमले हात पारेको छ ।
धनकुटा–५ तल्लो टुँडिखेलमा विहिवार सम्पन्न फाइनल खेलमा चौविसे गाउँपालिकाको महिला टिमलाई शुन्यका विरुद्ध दुई गोलअन्तरले पराजित गर्दै धनकुटा नगरपालिकाले उपाधी हात पारेको हो । धनकुटा नपा साविक विजेता पनि हो । अघिल्लो संस्करणमा पनि चौविसे गाउँपालिकालाई पराजित गर्दै धनकुटा नगरपालिकाले उपाधी जितेको थियो ।
उपाधीसँगै धनकुटा नगरपालिकाले नगद ६० हजार सहित ट्रफी हात पार्यो भने उपविजेतामा सीमित चौविसे गाउँपालिकाले नगद ३० हजार सहित ट्रफीमै चित्त वुझायो । धनकुटा नगरपालिकाको जितमा सन्ध्या रम्तेल र भूमिका राईले गोल गरेका थिए । दुवै गोल पहिलो हाफमा सम्भव भएको थियो । पहिलो हाफमा धनकुटा नगरपालिकाले चौविसेको टिमलाई दवावमा राखेको थियो । दोस्रो हाफको सुरुवातसँगै चौविसे गाउँपालिका खेलमा फर्किन कोसिस गरेपनि गोल स्कोर निकाल्न सकेन । गोलका केही अवसर सिर्जना गरेपनि फिनिसिङमा चुक्दा चौविसेले स्कोर निकाल्न नसक्दा उपविजेता मै चित्त वुझाउनु पर्यो । यता धनकुटाको टोलीले पाएको केही अवसरलाई गोलमा परिणत गर्न सकेन । लगातारको प्रहारलाई चौविसेका डिफेन्सले विफल तुल्याइदिएका थिए ।
फाइलन खेलको वुमन अफ द म्याच धनकुटा नगरपालिका टिमकी र्तिथकुमारी लिम्बु घोषित भइन् । त्यस्तै प्रतियोगिता भर सर्वाधिक सात गोल गर्ने धनकुटा नगरपालिकाकी विर्सना चौधरीलाई मायाको चिनो स्वरुप एक थान जर्सी उपलब्ध गराइएको थियो ।
सेमिफाइनलमा चौविसेले सहिदभूमिलाई र धनकुटा नगरपालिकाले पाख्रिवासलाई पराजित गर्दै फाइनल यात्रा तय गरेको थियो ।
कार्यक्रमका प्रमुख अतिथि धनकुटा नगरपालिका प्रमुख चिन्तन तामाङ, अतिथिहरु चौविसे गाउँपालिका अध्यक्ष राजकुमार लिम्बु, जिल्ला खेलकुद विकास समिति अध्यक्ष मनोज राई, धनकुटा फुटवल संघका अध्यक्ष मणी चेम्जोङ, नेपाल पत्रकार महासंघ धनकुटा अध्यक्ष नगेन्द्र राई, धनकुटा उद्योग वाणिज्य संघका अध्यक्ष विजयसन्तोषी राई लगायतले पुरस्कार वितरण गरेका थिए ।
सहिद रामकृष्ण श्रेष्ठ प्रतिष्ठानको अध्यक्ष ईश्वर श्रेष्ठको अध्यक्षतामा सम्पन्न कार्यक्रमको संचालन कला राईले गरेकी थिइन् ।
सहिद रामकृष्ण श्रेष्ठ स्मृति प्रतिष्ठानको आयोजनामा माघ २३ गते देखि प्रतियोगिता सुरु भएको थियो । प्रतियोगितामा धनकुटाको सातै स्थानीय तहको महिला टिम सहभागी थिए ।
सोही अवसरमा धनकुटाको महिला फुटवल टिमलाई धनकुटा उद्योग वाणिज्य संघले एक सेट जर्सी समेत हस्तान्तरण गरेको थियो । धनकुटा उद्योग वाणिज्य संघका अध्यक्ष विजय सन्तोषी राई र कोषाध्यक्ष रुपेश श्रेष्ठले संयुक्त रुपमा धनकुटा जिल्ला फुटवल संघका अध्यक्ष मणी चेम्जोङलाई हस्तान्तरण गरेका थिए ।
