धनकुटा । साँगुरीगढी गाउँपालिका वडा नं. १ मुलघाटमा १४ औं टुवोग महाशिवरात्री कप फुटवल प्रतियोगिता सुरु भएको छ ।
स्थानीय तम्मर फुटवल क्लवको आयोजनामा सुरु भएको प्रतियोगिताको प्रायोजक गोर्खा व्रुअरीको टुवोर्ग वियर र मुख्य सहयोगी साँगुरीगाउँपालिका रहेको छ ।
सोमवार एक कार्यक्रमका वीच प्रमुख अतिथि साँगुरीगढी गाउँपालिका अध्यक्ष जितेन्द्र राईले रेफ्री तुलसी लिम्बुलाई वल हस्तान्तरण गदै प्रतियोगिताको उद्घाटन गरेका थिए । कार्यक्रममा वोल्दै गाउँपालिका अध्यक्ष राईले खेलकुद क्षेत्रको विकासका लागि गाउँपालिकाले विशेष प्राथमिकतामा राखेको बताए ।
प्रतियोगिताको पहिलो दिन दुई वटा खेल सम्पन्न भए । उद्घाटन खेलमा अजम्वरी यूवा क्लवले मार्गादेवी यूवा क्लवलाई ५–३ गोलअन्तरले पराजित गर्दै विजयी सुरुवात गरेको छ । अजम्वरीको जितमा कप्तान विक्रम लिम्बुले तीन गोल गर्दै ह्याट्रिक पुरा गरे । भने सुशिल राई र टुप्पेले एक÷एक गोल गरेका थिए । त्यस्तै मागादेवी युवा क्लवको तर्फबाट किस्मत लिम्बु र मदन मगरले एक÷एक गोल गरे ।
त्यस्तै आजै सम्पन्न प्रतियोगिताको दोस्रो खेलमा सहिदभूमि–७ को सिद्धवावा फुटवल क्लवलाई ट्राइब्रेकरमा पराजित गर्दै फाक्सिव फुटवल क्लव विजयी सुरुवात गर्दै अघिल्लो चरणमा प्रवेश गरेको छ । फाक्सिवले सिद्धवावालाई ट्राइब्रेकरमा ६–५ गोलअन्तरले पराजित गरेको थियो । निर्धारित समय भित्र दुवै टिमले गोल गर्न नसकेपछि खेल ट्राइब्रेकरमा धकेलिएको थियो । ट्राइब्रेकरमा फाक्सिवले बाजी मार्न सफल भयो ।
प्रतियोगितामा धरान र धनकुटाका गरी २० वटा क्लवको सहभागिता रहेको आयोजक तम्मर फुटवल क्लवका अध्यक्ष पुष्पराज राईले बताए । प्रतियोगिताको विजेताले नगद ८५ हजार सहित ट्रफी र प्रमाण पत्र प्राप्त गर्नेछ । त्यस्तै उपविजेता टिमले नगद ४५ हजार सहित ट्रफी र प्रमाण पत्र प्राप्त गर्नेछ । प्रतियोगितामा सर्वोत्कृष्ट खेलाडी, उदयमान खेलाडी सहित विधागत रुपमा उत्कृष्ट हुने खेलाडीहरुलाई पनि पुरस्कारको व्यवस्था गरिएको अध्यक्ष राईले बताए । गतवर्ष धरान–१३ ले उपाधी जितेको थियो । शिवरात्रीको अवसर विगत १४ वर्षदेखि संचालन हुँदै आइरहेको प्रतियोगिताको फाइनल खेल आगामी ६ गते शनिवार हुनेछ ।
उद्घाटन कार्यक्रमको अवसरमा प्रमुख अतिथि साँगुरीगढी गाउँपालिका अध्यक्ष जितेन्द्र राईलाई आयोजकको तर्फबाट सम्मान गरिएको थियो । कार्यक्रममा विशेष अतिथि साँगुरीगढी गाउँपालिका वडा नं १ का वडाध्यक्ष गोविन्द लिम्वु, राष्ट्रिय भूमि आयोगका धनकुटा अध्यक्ष बलबहादुर राई र अतिथिहरू धनकुटा जिल्ला फुटबल संघका सचिव मानप्रसाद लिम्बु, अन्य स्थानीय वुद्दिजीवि, विभिन्न संघसंस्थामा आवद्द ब्यक्तित्वहरू, सुरक्षा निकायका प्रमुख लगायतको उपस्थिति रहेको थियो । उद्घाटन कार्यक्रमको अध्यक्षता तम्मर फुटवल क्लवका अध्यक्ष पुष्पराज राईले गरेका थिए ।