धनकुटा । साँगुरीगढी गाउँपालिका वडा नं. १ मुलघाटमा जारि १४ औं टुवोर्ग महाशिवरात्री कप फुटवल प्रतियोगिताको सेमिफाइनल खेलमा विजयी हुँदै रामलिहाङ् यूवा क्लव, टेकुनाला र धरान–१३ फाइनलमा प्रवेश गरेको छ । उपाधिको लागि यी दुई टिम वीचको खेल शनिवार हुनेछ ।
शुक्रवार सम्पन्न पहिलो सेमिफाइनल खेलमा प्रतियोगिताको साविक विजेता धरान–१३ ले माङ्दवा फुटवल क्लव वुढिमोरङलाई २–१ गोलअन्तरले पराजित गर्दै फाइनल पुग्ने पहिलो टिम वन्यो । धरान–१३ जितकोमा शैलेन्द्र नेपालले एक गोल गरेका थिए भने अर्को विपक्षी टिमले आत्मघाती गोल गर्दा उपहार पाएको थियो । माङ्दवाको लागि एक मात्र गोल रोशन राईले गरेका थिए ।
त्यस्तै दोस्रो सेमिफाइनल खेलमा विश्रान्ति फुटवल क्लव, मूलघाटलाई शुन्यका विरुद्ध एक गोलले पराजित गर्दै रामलिहाङ् यूवा क्लव, धनकुटा–८ टेकुनाला पनि फाइनलमा प्रवेश गरेको छ । रामलिहाङको लागि एक मात्र निर्णायक गोल योगेश थेगिमले गरेका थिए ।
प्रतियोगिताको विजेताले नगद ८५ हजार सहित ट्रफी र प्रमाण पत्र प्राप्त गर्नेछ । त्यस्तै उपविजेता टिमले नगद ४५ हजार सहित ट्रफी र प्रमाण पत्र प्राप्त गर्नेछ । प्रतियोगितामा सर्वोत्कृष्ट खेलाडी, उदयमान खेलाडी सहित विधागत रुपमा उत्कृष्ट हुने खेलाडीहरुलाई पनि पुरस्कारको व्यवस्था गरिएको अध्यक्ष पुष्पराज राईले बताए । गतवर्ष धरान–१३ ले उपाधी जितेको थियो । शिवरात्रीको अवसर विगत १४ वर्षदेखि प्रतियोगिता संचालन हुँदै आइरहेको छ । यो संस्करणमा २० टिमले सहभागिता जनाएका थिए ।
