धनकुटा । अमेरिकामा वस्दै आएका मनोज खड्काले धनकुटा नगरपालिका वडा नं. ६ पाङसिङस्थित दिलकुमारी राईको परिवारलाई सहयोग गरेका छन् । खड्काले सहकर्मी खिन्द्र अधिकारी मार्फत दिलकुमारी राईको परिवारलाई सहयोग गरेका हुन् ।
सोमवार उनको घरमै पुगेर ७ नं. वडाका वडाध्यक्ष रोशेष श्रेष्ठ, सहकर्मी खिन्द्र अधिकारी, त्रिवेणी माध्यमिक विद्यालयका प्राचार्य दीपक पोख्रेल, धनकुटा वचत तथा ऋण सहकारी संस्थाका अध्यक्ष खेम घिमिरे, ६ नं. वडा सदस्यद्वय पुरुषोत्तम अर्याल र मनकुमारी राई, समाजसेवी उर्गेन शाक्य, गाेकुल लुईटेल लगायतको टोलीले चामल ५० केजीको एक वोरा, रिफाइन तेल एक कार्टुन, मुसुरी दाल, चिउरा, भुजा, विस्कुट, जिरा, सावुन लगायत सामाग्री र १८ हजार नगद संयुक्त रुपमा हस्तान्तरण गरेका थिए ।
दिलकुमारीको श्रीमान राजबहादुर राईको ज्यालामजदुरी गर्ने क्रममा गत असोज २ करेन्ट लागेर मृत्यु भएको थियो । घरको अभिभावक राजवहादुरको निधन प्रश्चात परिवारको जीविकोपार्जनमा समस्या भएको छ । दिलकुमारी पनि मानसिक रुपमा रोगी छिन् । उनीहरुका चार जना सन्तान छन् । चार सन्तान मध्ये जेठी छोरीको विहे भइसकेको छ । माइली छोरी १५ वर्षकी एलिन राई त्रिवेणी माध्यमिक विद्यालयको कक्षा ८ मा र कान्छा छोरा ७ वर्षका आयान राई कक्षा ३ मा अध्ययनरत छन् । जेठा छोरा २६ वर्षका रविन्द्र राई ज्याला मजदुरी गरेर जीविकोपार्जन गर्छन् ।
दाताबाट प्राप्त नगद १८ हजार रुपैया धनकुटा वचत तथा ऋण सहकारी संस्थामा राखिएको छ । हरेक महिना १५ सय रुपैयाको दरले परिवारका सदस्यलाई प्रदान गरिने अधिकारीले बताए । सहयोग हस्तान्तरण कार्यक्रममा अधिकारीले सहयोगी दाताको वारे जानकारी गराएका थिए । त्यस्तै ७ नं. वडाध्यक्ष रोशेष श्रेष्ठले आर्थिक रुपले विपन्न परिवारलाई आगामी दिनमा सहयोग गर्ने प्रतिवद्धता व्यक्त गरेका थिए । त्रिवेणी माध्यमिक विद्यालयका प्राचार्य दिपक पोख्रेलका अनुसार मृृतक राजवहादुरको छोराछोरीलाई निःशुल्क पठनपाठन, स्टेशनरी, विद्यालय पोशाक लगायत सहयोग गर्दै आईरहेको छ ।
सहयोगी दाता मनोज खड्का धनकुटालाई लामो समय कार्यक्षेत्र बनाएर सामाजिक क्षेत्रमा सक्रिय थिए । अहिले उनी कार्यक्षेत्रको रुपमा अमेरिकामा वसोवास गरिरहेका छन् । त्यस्तै खड्काले लिवर्टी कलेजको कक्षा १२ मा अध्ययनरत सहिदभूमि गाउँपालिका वडा नं. ६ निवासी अस्मिका राईलाई अध्ययनमा सहयोग पुगोस् भन्ने उद्देश्यले ५ हजार रुपैया आर्थिक सहयोग समेत गरेका थिए ।
