धनकुटा । छथरजोपाटी गाउँपालिकामा बृहत निःशुल्क दुई दिने स्वाथ्य शिविर सुरु भएको छ । विराट मेडिकल कलेज टिचिङ्ग हस्पिटल बिराटनगरको प्राविधिक सहयोग तथा छथर जोरपाटी गाउँपालिकाको आयोजनामा वृहत निःशुल्क स्वास्थ्य शिविर सुरु भएको हो ।
छथरजोरपाटी गाउँपालिका–२ स्थित सेतो गुराँस बोर्डिङ स्कूलको प्राङ्गणमा शिविर संचालन गरिएको छ । शिविरमा मुटु रोग, सुगर, प्रेसर, स्त्री रोग हाडजोर्नी तथा नशा रोग, भिडियो एक्सरे, दम तथा फोक्सो लगायतका रोगहरुको विशेषज्ञ डाक्टरहरुबाट परिक्षण र उपचार गरिने छथरजोपाटी गाउँपालिका स्वास्थ्य शाखा प्रमुख सुन्दरमान ढंगोलले बताए ।
कार्यक्रममा वोल्दै प्रमुख अतिथि छथरजोरपाटी गाउँपालिका अध्यक्ष छत्रबहादुर सुब्बाले आर्थिक रुपले कमजोर नागरिकहरुलाई गाउँघर मै स्वाथ्य सेवा उपलब्ध गराउनका लागि शिविरको आयोजना गरिएको बताए । त्यस्तै कार्यक्रममा बोल्दै गाउँपालिकाका निवर्तमान अध्यक्ष शेरबहादुर लिम्बुले निशुल्क स्वाथ्य शिविरमा सहभागि भएर मौकाको फाइदा लिन सबै नागरिकलाई आग्रह गरे ।
उद्घाटन कार्यक्रममा स्वागत मन्तव्य राख्दै गाउँपालिका प्रमुख प्रशासकीय अधिकृत जितमान जिमीले स्वास्थ्य सेवा सबै नागरिकले पाउँनु पर्छ भन्ने उद्देश्यका साथ शिविरको आयोजना गरिएको बताए ।
उद्घाटन समारोहमा विराट मेडिकल कलेज टिचिङ्ग हस्पिटल विराटनगरका स्वास्थ्यकर्मी, जनप्रतिनिधि, समाजसेवी, वुद्धिजीवि विभिन्न सरकारी कार्यालयका प्रमुख तथा प्रतिनिधी, पत्रकार लागयत स्थानीय बासिन्दाको समेत उपस्थिति रहेको थियो । शिविर मंगलवारसम्म संचालन हुने शिविर संयोजकर्ताको रुपमा सहजीकरण गरिरहेका स्थानीय समाजसेवी विष्णु पौडेलले बताए ।