धनकुटा । ११३ औं अन्तर्राष्ट्रिय महिला दिवसको अवसर पारेर उद्यमी महिला बचत तथा ऋण सहकारी संस्था र मिसन मुस्कान पर्यटन प्रवद्र्धन केन्द्रले संयुक्त रुपमा शुभकामना आदान प्रदान कार्यक्रमको आयोजना गरेको छ ।
सदरमुकाम स्थित होटल मोरिङ्गाको सभाहलमा आयोजित कार्यक्रममा दुवै संस्थामा आवद्ध महिलाहरुको सहभागिता रहेको छ । सोही कार्यक्रमको अवसरमा संस्थामा आवद्ध महिलाहरु वीच कुर्सी घुमाई प्रतियोगिता संचालन गरिएको थियो ।
उक्त प्रतियोगितामा जूनि खालिङ राई प्रथम, जीवन खालिङ राई दोस्रो र सिर्जना भूजेलले तेस्रो स्थान हासिल गरेका थिए । प्रतियोगितामा १३ जनाको सहभागिता रहेको थियो । विजयी प्रतियोगिहरुलाई पर्यटन केन्द्र र सहकारी संस्थाका अध्यक्ष कुसुम राना मगरले पुरस्कार वितरण गरेकी थिइन् ।
“लैगिक समानताको बलियो आधारः सिर्जनात्मक प्रविधिमा महिलाको पहुँचको विस्तार” भन्ने मूल नाराका साथ अन्तर्राष्ट्रिय महिला दिवसको अवसरमा कार्यक्रम आयोजना गरिएको अध्यक्ष रानाले बताइन् । संस्थाले हरेक वर्ष महिला दिवसको अवसरमा विविध कार्यक्रम संचालन गर्दै आइरहेको सचिव रिता राईले बताइन् ।
