धनकुटा । आयोजक डाँडाबजार फुटवल क्लव र पंचायन फुटवल क्लव सुनसरी जंगवहादुर थापा स्मृति दोस्रो डाँडाबजार फुटवल प्रतियोगिताको सेमिफाइनलमा प्रवेश गरेको छ ।
साँगुरीगढी गाउँपालिका वडा नं. ५ स्थित डाँडाबजार खेलमैदानमा वुधवार सम्पन्न पहिलो खेलमा कोशी प्रदेश प्रहरी कार्यालय विराटनगरलाई पेनाल्टी सुटआउटमा ५–३ गोलअन्तरले पराजित गर्दै पंचायन फुटवल क्लव रामधुनी सुनसरी सेमिफाइनलमा प्रवेश गरेको हो ।
खेलको ९ औं मिनेटमा सन्दिप लिम्बुले गोल गर्दै पंचायनलाई सुरुवाती अग्रता दिलाए । उनले नै दोस्रो हाफको १३ औं मिनेटमा गोल गदैं अग्रतालाई दोब्बर बनाए । त्यस्तै दोस्रो हाफको १९ औं मिनेटमा प्रहरीका दिलबहादुर तामाङले गोल गर्दै अग्रता छोट्याए । पूनः २३ औं मिनेटमा पेनाल्टी मार्फत खेललाई वरावरीमा ल्याए । दोस्रो हाफको २५ औं मिनेटमा पंचायनका सन्दिपले एक गोल गर्दै ह्याट्रिक पुरा गरे । ३२ औं मिनेटमा महादेव तामाङले गोल गर्दै खेल ३÷३ को वरावरीमा ल्याए । निर्धारित समय वरावरीमा सकिएपछि खेल पेनाल्टी सुटआउटमा धकेलिएको थियो । पेनाल्टी सुटआउटमा पंचायन फुटवल क्लवले वाजी मार्न सफल भयो । उक्त खेलको म्यान अफ द म्याच पंचायनका सन्दिप लिम्बु घोषित हुँदै नगद २ हजार प्राप्त गरे ।
त्यस्तै दोस्रो खेलमा मोरङको हरैचा स्पोर्टस क्लवलाई ३–१ गोलअन्तरले पराजित गर्दै आयोजक डाँडाबजार फुटवल क्लव विजयी भयो । आयोजकको जितमा सुजन मगर, विपिन लिम्बु र इन्सन राईले गोल गरेका थिए । भने हरैचाको लागि सान्त्वना गोल राजेश लुंगेलीले गरेका थिए । उक्त खेलको म्यान अफ द म्याच डाँडाबजारका विपिन लिम्बु घोषित भए । उनले नगद दुई हजार रुपैया प्राप्त गरे ।
पहिलो हाफको ३ औं मिनेटमा गोल गर्दै सुजन मगरले आयोजकलाई अग्रता दिलाएका थिए । दोस्रो हाफको ५ औं मिनेटमा डाँडाबजारको लागि इन्सन राई गोल गर्दै अग्रता दोब्बर बनाए । त्यस्तै दोस्रो हाफको २३ औं मिनेटमा राजेश लुंगेलीले हरैचाको लागि गोल गरे । दोस्रो हाफको ३१ औं मिनेटमा विपिन लिम्बुले गोल गर्दै जित सुनिश्चित गरे
आजको खेल सँगै सेमिफाइनल समिकरण पुरा भएको छ । अव फाइनल प्रवेशको लागि शुक्रवार पहिलो सेमिफाइनल खेल रारा फुटवल क्लव राजारानी र पंचायन एफसी वीच हुनेछ । भने दोस्रो सेमिफाइनल खेल धरान सिटी फुटवल क्लव र डाँडा बजार फुटवल ब्लव वीच हुने आयोजक डाँडा बजार फुटवल क्लवका अध्यक्ष राजकुमार लिम्बुले बताए ।
प्रतियोगितामा आयोजक डाँडाबजार फुटवल क्लव सहित कोशी प्रदेशका विभिन्न ८ टिमको सहभागिता रहेको छ । प्रतियोगिताको विजेताले १ लाख ५० हजार र ट्रफी र उपविजेता टिमलाई नगद ७५ हजार र ट्रफी प्राप्त गर्नेछन् । त्यस्तै विधागत रुपमा उत्कष्ृट हुने खेलाडीलाई समेत पुरस्कारको व्यवस्था गरिएको छ ।
डाँडाबजार फुटवल क्लवको आयोजनामा संचालित प्रतियोगिताको मुख्य प्रायोजक दिलिप थापा हुन् । त्यस्तै ५ नं. वडा कार्यालय, साँगुरीगढी गाउँपालिका, गोर्खा व्रुअरी र वदरहुडले पनि सहयोग गरेको छ । प्रतियोगिताको फाइनल खेल आगामी २७ गते शनिवार हुँदैछ ।
