धनकुटा l जिल्लाको महालक्ष्मी नगरपालिकामा युएनडिपिको सहयोग र पर्डेप नेपालसंगको सहकार्यमा संचालनमा रहेको कृषि कार्यक्रम आगामी वर्ष पनि निरन्तरताको लागि स्थानिय किसानहरुले माग गरेका छन् ।
पर्डेप नेपालको आयोजनामा वुधवार महालक्ष्मी नगरपालिकाको लेगुवा वजारमा सम्पन्न संचालित परियोजनाको वार्षिक समिक्षा गोष्ठीमा सहभागी स्थानिय किसानहरुले कृषि कार्यक्रम प्रभावकारी रहेको भन्दै यस्तो माग गरेका हुन् ।
यूएनडिपिको सहयोगमा कृषि कृयाकलाप मार्फत किसानको आर्थिक समृद्धि गराउने उदेश्यले कोभिड पछिको पुनर्उत्थान विशेष कार्यक्रम संचालन गरिएको पर्डेप नेपाल धनकुटाका निर्देशक मिन सुवेदीले वताए । उनले १ वर्ष देखि महालक्ष्मी नगरपालिकाको वडा नं.२,३,४,५ र ६ नम्वर वडामा पर्डेप नेपालले संचालन गरेको कार्यक्रमको सरोकारवालाहरुलाई वोलाएर रिभ्यू कार्याशाला गोष्ठी गरिएको स्पष्ट पारे । उनले ०७८ चैत्र २ गते देखि संचालन भएको परियोजनाको कुल लागत महालक्ष्मी नगरपालिकाको साझेदारीमा जम्मा २ करोड, ८२ हजारको हाराहारीमा रहेको बताए । उनले परियोजना सम्पन्न गर्नको लागि यूएनडिपिको १ करोड, ३२ हजार अनुदान र महालक्ष्मी नगरपालिकाको १ करोड, ५० हजार लगानी रहेको बताए । पर्डेप नेपाल र महालक्ष्मी नगरपालिकाको साझेदारमा संचालित कृषि कार्यक्रम अन्तर्गत माथि उल्लेखित वडाहरुमा तरकारी खेतीको लागि ५ सय २६ घरधुरीमा टनेल घर निर्माण गरिएको छ । प्रति टनेल घर २ हजार, ९ सय ९४ रुपयाँको लागतमा निर्माण गरिएको जानकारी निर्देशक सुवेदीले दिएका छन् ।
त्यसैगरी हाईटेक भिजिटेवल फार्मिङ १२ वटा प्रति गोटा १ लाखको दरले निर्माण गरिएको छ । त्यसैगरी आँप खेती ४५ घरधुरी, जि नाईन प्रजातीको केरा खेती ९९ घरधुरी र आलु खेती ५३ घरधुरीमा संचालन गरिएको छ । त्यसैगरी गाईपालन, च्यापकटर वितरण, होम वायोग्याँस प्लान, सामाजिक विषय व्यवस्थापन प्राविधिक तालिम र साना सिचाँईको लागि पाईप वितरण र नमूना बाख्राको खोर निर्माण कार्यक्रम पनि संचालनमा रहेको थियो ।
कार्यक्रममा सहभागीहरुले १ वर्षको अवधीमा संचालित कार्यक्रमहरु किसानको लागि आयआर्जनको पाटोमा प्रभावकारी रहेको प्रतिक्रिया दिएका छन् । वार्षिक समिक्षा गोष्ठीमा वोल्दै महालक्ष्मी नगरका निवर्तमान प्रमुख पर्शुराम नेपालले केरा खेतीको लागि किसानहरुको अत्याधिक माग आएको वताए । उनले लामो समय देखि वाँझिएको खाली जमिनमा किसानले केरा खेती लगाएकाले पनि प्रभावकारी भएको वताए । १ वर्ष देखि संचालनमा रहेको यूएनडिपिसंगको नगरपालिकाको कार्यक्रम प्रभावकारी रहेको औल्याउँदै अनुगमनको पाटो राम्रो वनाउनु पर्नेमा जोड दिए । उनले कार्यक्रमलाई प्रभावकारी वनाउन संचालित वडाहरुमा कृषकहरुको क्षमता विकासको लागि नेटवर्क वनाउनु पर्नेमा जोड दिए ।
नगर प्रमुख ध्रुर्व रायाले संचालित कार्यक्रमको लागि सम्झौता अनुसार नगरपालिकाले आफ्नो जिम्मेवारी पुरा गर्दै आएको वताएका छन् । उनले आगामी आर्थिक वर्ष पर्डेप नेपाल मार्फत यूएनडिपिसंगको सहकार्य र साझेदारीमा थप कार्यक्रम संचालन गर्ने बताए । उनले आगामी आर्थिक वर्षको लागि कृषि कार्यक्रम संचालन गर्न ७५ लाख रुपयाँ विनियोजन गरिएको पनि स्पष्ट पारे । कृषकको जीवन स्तर व्यवसायिक र आधुनिक कृषि प्रविधिबाट माथि उठाउँन नयाँ सोँचका साथ नगरले कार्यक्रम अघि वढाउने नगर प्रमुख रायले बताए ।
कार्यक्रममा वोल्दै महालक्ष्मी नगरपालिका वडा नंं.५ का वडाध्यक्ष सन्त वहादुर कुँवरले कृषकलाई राहात हुने गरी प्रभावकारी ढंगले यथार्थ झल्किने गरी कार्यक्रम आउनु पर्नेमा जोड दिए । कृषि ज्ञान केन्द्र धनकुटाका प्रमुख नगेन्द्र राना मगरले कार्यक्रमले किसानलाई सहयोग पुगेको आफूले अनुगमनको क्रममा पाएको वताए । उनले भने–‘आगामी दिनमा पनि यो कार्यक्रमले निरन्तरता पाए किसानलाई फाइदा हुनेछ ।’
कार्यक्रममा महालक्ष्मी नगरपालिका वडा नं.३ का किसान देवी वहादुर कार्कीले गाई भैसी नभई मल हुँदैन, मल मात्र भएर पनि भएन, विउविजन चाँहियो भन्दै सोही अनुसारका कार्यक्रम आफूहरुलाई आवश्याक रहेको औल्याए । त्यसैगरी महालक्ष्मी न.पा.४ का अर्का किसान नगेन्द्र पौडेल लगायतले यूएनडिपिसंगको कार्यक्रमको निरन्तरताको लागि आवश्याक पहल गर्न नगरपालिकालाई अनुरोध गरेका छन् ।
