धनकटा । धनकुटामा जारी कोशी प्रदेश स्तरीय तथा खुल्ला दोस्रो धनकुटा कप ब्याडमिन्टन प्रतियोगिताको उपाधी पुरुष एकलतर्फ सुनसरीका सत्यम सुब्बा र महिला एकलतर्फ मोरङकी निता लम्सालले जितेका छन् ।
धनकुटा–६ वहुउद्देश्यीय सामुदायिक भवनमा शनिवार सम्पन्न फाइनल खेलमा झापाका प्रनिश सिंह ठकुरीलाई फाइनल सेटमा पराजित गर्दै सुनसरीका सत्यमले उपाधी जितेका हुन् । उनले नगद २० हजार सहित मेडल र ट्रफी हात पारे भने उपविजेता भएका प्रनिशले नगद १२ हजार सहित मेडल र ट्रफीमा चित्त वुझाए । पहिलो सेटमा १९–२१ ले पराजित भएपनि दोस्रो सेट २१–१७ र फाइनल सेट २१–८ ले प्रनिशलाई पराजित गर्दै सत्यमले उपाधी जितेका थिए । पुरुष एकलतर्फ सेमिफाइनल पुगेका भोजपुरका विशाल तामाङ र झापाका नविन सिलवाल तेस्रो स्थान हात पार्दे नगद ८ हजार सहित मेडल र ट्रफी हात पारे ।
त्यस्तै महिला एकलतर्फ मोरङकी निता लम्सालले उदयपुरकी रोजी राईलाई २१–५, २१–१४ ले पराजित गर्दै उपाधी जितिन् । उनले नगद २० हजार रुपैया सहित ट्रफि र मेडल हात पारिन् । भने उपविजेता भएकी रोजीले नगद १२ हजार सहित ट्रफी र मेडलमा चित्त वुझाइन् । एकल महिला तर्फ सेमिफाइनल पुगेका धनकुटाका अरुणा तामाङ र झापाका अन्जना राईले तेस्रो स्थान प्राप्त गर्दै नगद ८ हजार सहित ट्रफी र मेडल हात पारे ।
प्रतियोगिताको पुरुष युगलतर्फको उपाधी सुनसरीका सत्यम सुब्बा र सुमन लिम्बूको जोडीले हात पारे । संखुवासभाका सृजल पोखरेल र
प्रविन लिङ्थेपको जोडीलाई २१–१०, २१–१७ ले पराजित गर्दै सत्यम र सुमनको जोडीले उपाधी हात पारेका हुन् । पुरुष युगलतर्फ विजेता जोडीले नगद ३० हजार सहित ट्रफी र मेडल, उपविजेता जोडीले नगद २० हजार सहित ट्रफी र मेडल हात पारे । त्यस्तै सेमिफाइनल पुगेका झापाका प्रनिश सिंह ठकुरी र नविन सिलवाल, लाक्पा शेर्पा र महेश खड्काको जोडी तेस्रो हुँदै नगद १० हजार सहित ट्रफी र मेडल हात पारे ।
मिक्स युगलतर्फको उपाधी प्रनिशसिंह ठकुरी र अनिता गिरीको जोडीले हात पारे । उनीहरुले सुनिल सिलवाल र अन्जना राईको जोडीलाई २१–१९, १९–२१ र २१–१६ ले पराजित गर्दै उपाधी जितेका हुन् । विजेता जोडीले नगद २० हजार नगद सहित ट्रफी र मेडल, उपविजेता जोडीले नगद १२ सहित ट्रफी र मेडल प्राप्त गरे । त्यस्तै मिक्स युगलतर्फ सेमिफाइनल पुगेका विनय चौधरी र रोजी राईको जोडी, सत्यम सुब्बा र जोगिता लिम्बूको जोडीले तेस्रो प्राप्त गर्दै ४÷४ हजार सहित ट्रफी र मेडल प्राप्त गरे ।
मास्टर ५५ प्लस युगलतर्फ दिलवहादुर कन्दङ्वा कास्की र दानवहादुर तामाङ भोजपुरको जोडिलाई २१–११, २१–११ ले पराजित गर्दै वुद्धि चौधरी चितवन र विष्णुलाल श्रेष्ठ धादिङको जोडिले उपाधी जितेका छन् । उक्त विधातर्फ विजेता हुने जोडिले नगद २५ हजार सहित ट्रफी र मेडल, उपविजेता जोडीले नगद १५ सहित ट्रफी र मेडल हात पारे । सेमिफाइनल पुगेका इटहरीका देव तामाङ र शान्ता तामाङको जोडी, रमेश भट्टचन कास्की र दिपक राई उदयपुरको जोडीले तेस्रो स्थान प्राप्त गर्दै ५÷५ हजार सहित ट्रफी र मेडल प्राप्त गरे ।
मास्टर ४५ प्लस युगलतर्फ धरानका लोकमान श्रेष्ठ र काठमाडौंका सञ्जय कपालीको जोडीले ताप्लेजुङका मदन लिम्बू र घनेन्द्र आङ्वुहाङको जोडीलाई २१–१६ र २१–१३ ले पराजित गर्दै उपाधी जिते । विजेता हुने जोडिले नगद २५ हजार सहित ट्रफी र मेडल, उपविजेता जोडीले नगद १५ सहित ट्रफी र मेडल हात पारे । त्यस्तै सेमिफाइनल पुगेका पाँचथरका दिप आङ्देम्वे र इटहरीका श्याम लामाको जोडी, ललितपुरका पूर्णभक्त चित्रकार र मोरङका डिल्लीराम डाँगीको जोडी तेस्रो स्थान प्राप्त गर्दै ५÷५ हजार सहित ट्रफी र मेडल प्राप्त गरे ।
समापन कार्यक्रमका प्रमुख अतिथि धनकुटा नगरपालिकाका प्रमुख चिन्तन तामाङ, धनकुटा जिल्ला ब्याडमिन्टन संघ धनकुटाका अध्यक्ष योगेश्वर श्रेष्ठ लगायतले पुरस्कार वितरण गरेका थिए ।
प्रतियोगिताको मुख्य प्रायोजक धनकुटा नगरपालिका, सहप्रायोजक छिन्ताङ घर भई हाल हङकङ निवासी बीरभक्त राई र सहकार्यको रुपमा प्रदेश खेलकुद विकास वोर्ड रहेको थियो । धनकुटा जिल्ला ब्याडमिन्टन संघ आयोजक रहेको प्रतियोगिता चार दिनसम्म चलेको थियो । प्रतियोगितामा प्रदेश भरिका ८२ टिमको सहभागिता रहेको थियो । खेलाडीहरुले ६ वटा विधामा प्रतिस्पर्धा गरेका थिए ।
