धनकुटा । सुनसरीको तालतलैया एकेडेमीलाई पेनाल्टी सुटआउटमा पराजित गर्दै धनकुटाको डाँडाबजार फुटवल क्लव रारा गोल्डकपको फाइनलमा प्रवेश गरेको छ ।
राजारानीमा जारि अग्नी-बसुन्धरा १० औं गोर्खा स्ट्रङ रारा गोल्डकपको मंगलवार सम्पन्न सेमिफाइनल खेलमा तालतलैया एकेडेमीलाई ट्राइब्रेकरमा ४–२ गोलअन्तरले पराजित गर्दै डाँडाबजार फाइनलमा प्रवेश गरेको हो ।
निर्धारित समयको खेल एक÷एक गोलको वरावरीमा सकिएपछि ट्राइब्रेकरमा धकेलिएको थियो ।
ट्राइब्रेकरमा डाँडाबजारको तर्फबाट सिशष थापा, निरज थापा मगर, विशाल भण्डारी र ओशकरले गोल गरेका थिए । त्यस्तै तालतलैयाको तर्फबाट रोमन तामाङ र विवश गुरुङले गोल गरे भने । प्रेमा तामाङ र रोमन भूजेलको प्रहार डाँडाबजारका गोलकिपर प्रमिजय गच्छदारले रोके ।
पहिलो हाफमा दुवै टिमको गोल हुन सकेन । खेलको ७९ औं मिनेटमा फोफोनाले गोल गर्दै तालतलैयालाई अग्रता दिलाए । तर खेलको अन्त्यतिर ९० औं मिनेटमा विशाल भण्डारीले गोल गर्दै खेल वरावरीमा ल्याए । त्यसपछि दुवै टिमबाट थप गोल हुन सकेन । खेल ट्राइब्रेकरमा धकेलियो ।
खेलको म्यान अफ द म्याच डाँडाबजारका विशाल भण्डारी घोषित भए । उनले नगद ५ हजार सहित ट्रफी प्राप्त गरे । वुधवार प्रतियोगिताको दोस्रो सेमिफाइनल खेल सहलेश यूथ क्लव सिराहा र पथरी फुटवल क्लव मोरङ वीच हुने प्रचारप्रसार संयोजक सविन अधिकारीले बताए । भोलीको सेमिफाइनल विजेताले विहिवार हुने फाइनल खेलमा डाँडाबजार फुटवल क्लवसँग प्रतिस्पर्धा गर्नेछ ।
राजारानीमा लाग्ने ऐतिहासिक चण्डी पूर्णिमा मेलाको अवसर पारेर आयोजक भएको १० औं गोर्खा रारा गोल्डकपको विजेताले नगद तीन लाख रुपैया सहित रारा गोल्डकपको ट्रफी र उपविजेताले एक लाख ५० हजार रुपैया प्रदान गरिने आयोजक रारा क्लवका अध्यक्ष मणी चेम्जोङले बताए ।
विधागत रुपमा उत्कृष्ट हुने खेलाडीहरूले जनही नगद १० हजार रुपैयाँ ट्रफी र प्रतियोगिताको सर्वोत्कृष्ट खेलाडीले नगद २० हजार रुपैयाँ र ट्रफी प्रदान गरिने आयोजकले जनाएको छ ।