धनकुटा । फागुराम थारुको दुई गोलको मद्दतले सिराहाको सलहेश क्लव राजारानीमा जारि १० औं गोर्खा रारा गोल्डकपको फाइनलमा प्रवेश गरेको छ ।
वुधवार सम्पन्न सेमिफाइनल खेलमा मोरङको पथरी फुटवल क्लवलाई शुन्यका विरुद्ध दुई गोलअन्तरले पराजित गर्दै सलहेश फाइनलमा प्रवेश गरेको हो । सलहेशको जीतमा फागुराम थारुले खेलको ५० र ५८ औं मिनेटमा गोल गरे । उनी खेलका म्यान अफ द म्याच घोषित हुँदै नगद ५ हजार सहित ट्रफी हात पारे ।
खेलको अन्त्यतिर थपिएको ५ मिनेटको अतिरिक्त समयमा पथरीले पेनाल्टीको अवसर पाएको थियो । तर पथरीका युकेश तामाङको प्रहार पोस्टवाट वाहिरियो ।
सलहेशले उपाधीको लागि डाँडाबजार फुटवल सँग प्रतिस्पर्धा गर्ने छ । डाँडाबजार यस अघिनै फाइनल प्रवेश गरिसकेको छ । फाइनल खेल विहिवार हुने प्रचारप्रसार संयोजक सविन अधिकारीले बताए ।
राजारानीमा लाग्ने ऐतिहासिक चण्डी पूर्णिमा मेलाको अवसर पारेर आयोजक भएको १० औं गोर्खा रारा गोल्डकपको विजेताले नगद तीन लाख रुपैया सहित रारा गोल्डकपको ट्रफी र उपविजेताले एक लाख ५० हजार रुपैया प्रदान गरिने आयोजक रारा क्लवका अध्यक्ष मणी चेम्जोङले बताए ।
विधागत रुपमा उत्कृष्ट हुने खेलाडीहरूले जनही नगद १० हजार रुपैयाँ ट्रफी र प्रतियोगिताको सर्वोत्कृष्ट खेलाडीले नगद २० हजार रुपैयाँ र ट्रफी प्रदान गरिने आयोजकले जनाएको छ ।
