धनकुटा l चौविसे गाउँपालिका केन्द्र राजारानीमा सम्पन्न १० औं रारा गोल्कडपको उपाधी सिराहाको सलहेश क्लवले हात पारेको छ । विहिवार सम्पन्न फाइनल खेलमा डाँडाबजार फुटवल क्लवलाई ४–१ गोलअन्तरले पराजित गर्दै सलहेश क्लवले उपाधी हात पारेको हो ।
उपाधीसँगै सलहेश क्लवले नगद ३ लाख रुपैया सहित ट्रफी प्राप्त गर्यो भने प्रतियोगिताको उपविजेता भएको डाँडाबजार फुटवल क्लवले १ लाख ५० हजार र ट्रफीमा चित्त वुझायो ।
सलहेशको जितमा फागुराम थारुले २ गोल, समिर तामाङले एक र एक गोल डाँडाबजारका खेलाडीले आत्मघाती गोल गरे । डाँडाबजारको तर्फबाट एक गोल निरज थापा मगरले पेनाल्टीबाट गोल गरेका थिए ।
प्रतियोगिताको सर्वोत्कृष्ट खेलाडी सलहेश क्लवका फागुराम थारु घोषित भए । उनले नगद २० हजार रुपैया प्राप्त गरे ।
विधागत तर्फ उत्कृष्ट गोलकिपर सलहेशका निश्चल मोक्तान, सर्वाधिक गोलकर्ता फागुराम थारु, उदयीमान खेलाडी रारा फुटवल क्लवका अरविन तामाङ घोषित भए । राजारानीमा लाग्ने ऐतिहासिक चण्डी पूर्णिमा मेलाको अवसर पारेर रारा फुटवल क्लवले प्रतियोगिताको आयोजना गरेको हो ।
