धनकुटा । साँगुरीगढी गाउँपालिका वडा नं. ५ डाँडाबजारमा गतफागुनमा सम्पन्न जंगबहादुर थापा स्मृति दोस्रो डाँडाबजार गोल्डकप फुटवल प्रतियोगिताको आय–व्यय सार्वजनिक गरिएको छ ।
आयोजक डाँडाबजार फुटवल क्लवले शनिवार एक कार्यक्रमको आयोजना गरि प्रतियोगिता संचालनको आय–व्यय सार्वजनिक गरेको हो । क्लवका कोषाध्यक्ष मणी देवानले प्रस्तुत गरेको आर्थिक प्रतिवेदन अनुसार प्रतियोगितामा १८ लाख १३ हजार ७ सय २२ रुपैया आम्दानी भएको र १५ लाख ८३ हजार ४ सय ३८ रुपैया खर्च भएको छ । आम्दानीवाट खर्च कटाएर बाँकी रहेको २ लाख ३० हजार २ सय ८४ रुपैया रकम बचत भएको कोषाध्यक्ष देवानले बताए । प्रस्तुत गरिएको आर्थिक प्रतिवेदन प्रारम्भिक रहेको उनले बताए । अझैं सहयोगी दाताहरुबाट सहयोग रकम उठ्न वाँकी रहेको उनी बताउँछन् । खर्चको कुल रकम मध्ये गोल्डकपकै अवसरमा आयोजित साँस्कृतिक कार्यक्रममा ३ लाख १७ हजार रुपैया र बाँकी रकम गोल्डकप प्रतियोगिता संचालन गर्न खर्च भएको जानकारी दिइयो ।
गोल्डकप संचालनको लागि साँगुरीगढी गाउँपालिकाले २ लाख, ५ नं. वडा कार्यालयले ३ लाख र वाँकी दाताहरुबाट भौतिक तथा आर्थिक सहयोग रकम प्राप्त भएको थियो । साेही अवसरमा प्रतियोगिता संचालनमा सहयाेग गर्ने व्यक्तित्वहरुलाई सम्मान समेत गरिएको थियो ।
आय–व्यय सार्वजनिक कार्यक्रमको अध्यक्षता डाँडाबजार फुटवल क्लवका अध्यक्ष राजकुमार सुब्बाले गरेका थिए । कार्यक्रममा साँगुरीगढी गाउँपालिका वडा नं. ५ का वडाध्यक्ष खड्ग लिम्बु, क्लवका पूर्वखेलाडी तथा रेफ्री मिलन थेगिम, वडाका कर्मचारी छत्र सुब्बा लगायतको उपस्थिति रहेको थियो ।
गत फागुनमा सम्पन्न जंगबहादुर थापा स्मृति डाँडाबजार गोल्डकपको दोस्रो संस्करणको उपाधी आयोजक डाँडाबजार फुटवल क्लवले जितेको थियो । फाइनलमा राजारानीको रारा फुटबल क्लबलाई डाँडाबजारले टाइब्रेकरमा ५–३ ले गोल अन्तरले पराजित गरेको थियो ।
