धनकुटा । १४ औं संस्करणको विजेता समेत रहेको सशस्त्र प्रहरी बल (एपिएफ) क्लव धनकुटामा जारि सहिद भीमनारायण गोल्डकपको क्वाटरफाइनलबाटै बाहिरिएको छ ।
धनकुटा सदरमुकामस्थित तल्लो टुँडिखेलमा शनिवार सम्पन्न खेलमा बी डिभिजन क्लव विरगञ्ज युनाइटेडसँग पेनाल्टी सुटआउटमा ४-१ गोलअन्तरले पराजित हुँदै साविक विजेता एपिएफ क्वाटरफाइनल खेलबाटै बाहिरिएको हो ।
काठमाडाैंमा सहिद स्मारक ए डिभिजन लिग संचालन भइरहेको कारण धनकुटामा जारि भीमनारायण गोल्डकपमा एपिएफले जुनियर टिम मैदानमा उतारेको थियो । एपिएफको सिनियर टिम अहिले काठमाडाैंमा ए डिभिजन लिग खेलिरहेको छ ।
निर्धारित समय २/२ गोलको बरावरीमा सकिएपछि खेल पेनाल्टी सुटआउटमा धकेलिएको थियो । पेनाल्टी सुटआउटमा विरगञ्जले एपिएफ माथि बाजी मार्न सफल भयो ।
पेनाल्टी सुटआउटमा वीरगञ्जको तर्फबाट शिसष थापा, श्याम चौधरी, निरज थापा र विवेक चौधरीले गोल गरेका थिए ।
एफिएफको तर्फबाट प्रविणकुमार स्याङ्तानले मात्र गोल गरे । महेश लामाको प्रहार विपक्षी गोलकिपर दिलमणी चौधरीले रोके । त्यस्तै एपिएफका घनश्याम थारुको प्रहार गोलपोस्ट् माथिबाट वाहिरियो ।
खेलको २३ औं मिनेटमा निरज थापाले गोल गर्दै वीरगञ्जलाई सुरुवाती अग्रता दिलाएका थिए । एपिएफका सन्तोष कटुवालले ६३ औं मिनेटमा गोल गर्दै खेल वरावरीमा ल्याए । ७३ औं मिनेटमा विरेन्द्र प्रसाद यादवले दोहोरो पहेलो कार्ड पाउँदै मैदानवाट वाहिरिएपछि एपिएफ १० खेलाडीमा सीमित भयो । ८४ औं मिनेटमा एपिएफका प्रविणकुमार स्याङ्तानले गोल गर्दै आफ्नो टिमलाई २–१ को अग्रता दिलाए । ८६ औं मिनेटमा वीरगञ्जका विवेक चौधरीले गोल गर्दै खेल वरावरीमा ल्याए ।
खेलको अन्तिम १७ मिनेट एपिएफ १० खेलाडीमा सिमित भयो । विपक्षी खेलाडी माथि खराब ट्याकल गरेको कारण एपिएफका विरेन्द्र प्रसाद यादव दाेहाेरो पहेलाे कार्ड पाउँदै मैदानबाट वाहिरिए ।
त्यसपछि दुवै टिमबाट गोल हुन सकेन । खेल पेनाल्टी सुटआउटमा पुग्यो । खेलको म्यान अफ द म्याच वीरगञ्जका गोलकिपर दिलमणी चौधरी घोषित भए । उनले नगद ४ हजार सहित ट्रफी प्राप्त गरे ।
आइतवार पहिलो सेमिफाइनल खेल हुनेछ । वी डिभिजन क्लव प्लानिङ ब्याइज काठमाडौं र मोरङको पेमा यूवा क्लव वीच हुने प्रतियोगिताको संयोजक शम्भु प्रधानले बताए ।
प्रतियोगिताको विजेताले नगद ५ लाख सहित ट्रफी र उपविजेताले दुई लाख ५० हजार हात पार्नेछ । हरेक खेलमा म्यान अफ द म्याच पुरस्कारको व्यवस्था गरिएको छ । त्यस्तै विधागत तर्फका उत्कृष्ट खेलाडीहरुलाई पुरस्कार प्रदान गरिने छ ।
२०५५ सालमा स्थापित गोल्डकप सुरुका दुईवर्ष नियमित रुपमा सञ्चालन भएको थियो । त्यसपछि देशको तत्कालीन असहज परिस्थितका कारण सञ्चालन हुन सकेन । २०६३ सालपछि गोल्डकप बर्षेनी सञ्चालन हुँदै आइरहेको छ । २०५५ सालमा धनकुटा नगरपालिका वडा नं. ६ का तत्कालीन् वडाध्यक्ष राजेश्वर वहादुर श्रेष्ठले प्रतियोगिताको सुरुवात गरेका हुन् ।
नेपाल कांग्रेसका नेता शहीद भीमनारायण श्रेष्ठलाई विराटनगरमा राजा विरेन्द्रलाई बम हानेको आरोपमा पक्राउ गरि २०३५ सालमा तत्कालिन सरकारले गोली हानी हत्या गरेको थियो । उनलाई तत्कालीन् सरकारले २०७३ सालमा राष्ट्रिय सहिद घोषणा गरेको थियो ।