धनकुटा । विराटनगरको पेमा यूवा क्लवलाई ट्राइव्रेकरमा पराजित गर्दै बी डिभिजन क्लव प्लानिङ ब्वाइज युनाइटेड सहिद भीमनारायण गोल्डकपको फाइनलमा प्रवेश गरेको छ । आइतवार धनकुटा सदरमुकामस्थित तल्लो टुँडिखेलमा सम्पन्न सेमिफाइनल खेलमा विराटनगरको पेमा यूवा क्लवलाई पेनाल्टी सुटआउटमा ५–४ गोलअन्तरले पराजित गर्दै प्लानिङ ब्वाइज फाइनलमा प्रवेश गरेको हो ।
निर्धारित समय गोलरहित वरावरीमा सम्पन्न भएपछि खेल पेनाल्टीसुटआउटमा पुगेको थियो । पेनाल्टी सुटआउटमा प्लानिङ ब्वाइजको तर्फबाट विशाल दर्जी, ड्याडी वाम्बा, राजेश शाह, रिशव अधिकारी, यो निपोलियनले गोल गरेका थिए ।
त्यस्तै पेमाको तर्फबाट भिष्म क्षेत्री, सजिन थापा मगर, रिम, र यानिकले गोल गरेका थिए । भने विवेश राईको प्रहार प्लानिङ ब्वाइजका गोलकिपर लोकेश चौधरीले रोकेका थिए । उनी खेलको म्यान अफ द म्याच घोषित हुँदै नगद ४ हजार सहित ट्रफी हात पारे ।
पहिलो र दोस्रो हाफमा दुवै टिमका खेलाडीले पाएको अवसरलाई सदुप्रयोग गर्न नसक्दा गोल गर्नबाट चुके । प्लानिङ ब्वाइजका फागुराम थारुले पटक–पटक पाएको अवसरलार्य सदप्रयोग गर्न सकेनन् । उनलाई पेमाका डिफेन्डरले रोकेका थिए ।
प्रतियोगिताको दोस्रो सेमिफाइनल खेल सोमवार झापा फुटवल क्लव र विरगञ्ज युनाइटेड क्लव वीच हुने आयोजक समितिका संयोजक शम्भु प्रधानले बताए ।
प्रतियोगिताको विजेताले नगद ५ लाख सहित ट्रफी र उपविजेताले दुई लाख ५० हजार हात पार्नेछ । हरेक खेलमा म्यान अफ द म्याच पुरस्कारको व्यवस्था गरिएको छ । त्यस्तै विधागत तर्फका उत्कृष्ट खेलाडीहरुलाई पुरस्कार प्रदान गरिने छ ।
२०५५ सालमा स्थापित गोल्डकप सुरुका दुईवर्ष नियमित रुपमा सञ्चालन भएको थियो । त्यसपछि देशको तत्कालीन असहज परिस्थितका कारण सञ्चालन हुन सकेन । २०६३ सालपछि गोल्डकप बर्षेनी सञ्चालन हुँदै आइरहेको छ । २०५५ सालमा धनकुटा नगरपालिका वडा नं. ६ का तत्कालीन् वडाध्यक्ष राजेश्वर वहादुर श्रेष्ठले प्रतियोगिताको सुरुवात गरेका हुन् ।
नेपाल कांग्रेसका नेता शहीद भीमनारायण श्रेष्ठलाई विराटनगरमा राजा विरेन्द्रलाई बम हानेको आरोपमा पक्राउ गरि २०३५ सालमा तत्कालिन सरकारले गोली हानी हत्या गरेको थियो । उनलाई तत्कालीन् सरकारले २०७३ सालमा राष्ट्रिय सहिद घोषणा गरेको थियो ।