धनकुटा । नेपाल रेडक्रस सोसाइटी धनकुटाले साँगुरीगढी गाउँपालिका भरिका ८ वटा विद्यालयमा विपद् जोखिम न्यूनिकरण तथा अनुशिक्षण कार्यक्रम संचालन गरेको छ ।
साँगुरीगढी गाउँपालिकाको आर्थिक सहयोगमा उक्त कार्यक्रम संचालन गरेको हो । कार्यक्रमको सहयोगी निकायको रुपमा तथा भीमदल गण सल्लेरी ब्यारेक, जिल्ला प्रहरी कार्यालय, सशस्त्र प्रहरी बल, नेपाल ६ नं. गुल्म हेड क्वाटर छिन्ताङ रहेका थिए ।
गत वैशाख २६ देखि ३१ गतेसम्म साँगुरीगढी गाउँपालिका वडा नं. ५ डाँडाबजार स्थित भानु माध्यमिक विद्यालयमा, वडा नं. ६ नाम्जे भेडेटार स्थित ग्रामिण जना माध्यमिक विद्यालय, वडा नं. ३ मादेन स्थित भानुभक्त आधारभुत विद्यालय, वडा नं. ४ फाक्सिव स्थित फाक्सिव आधारभुत विद्यालय, वडा नं. ४ फाक्सिव स्थित फाक्सिव आधारभुत विद्यालय, लेउतीटारस्थित राम माध्यमिक विद्यालय, वडा नं. २ वुढिमोरङस्थित रामनवमी माध्यमिक विद्यालय, वडा नं. ९ आहालेस्थित सिंहकाली माध्यमिक विद्यालय, वडा नं.७ महाभारत स्थित गोलखाडी माध्यमिक विद्यालयमा कार्यक्रम आयोजना गरिएको नेपाल रेडक्रस सोसाइटी धनकुटाका अध्यक्ष छत्रकुमार श्रेष्ठ (कृष्ण)ले जानकारी दिए ।
उनका अनुसार हरेक स्थानमा सम्पन्न कार्यक्रममा जनप्रतिनिधि, विद्यालय व्यवस्थापन समिति तथा शिक्षक अभिभावक संघका सदस्यहरु, विद्यालयका प्रधानाध्यापक, शिक्षक र विद्यार्थीहरुको सहभागिता रहेको थियो ।
अनुशिक्षण कार्यक्रममा नेपाल रेडक्रस सोसाइटी धनकुटाका निवर्तमान सभापति हरिकुमार राई र शसस्त्र प्रहरी वल छिन्ताङ गुल्मका इन्पेक्टर विश्वनाथ पोखरेलले विद्यालयमा आधारित विपद् जोखिम, जिल्ला प्रहरी कार्यालय धनकुटाका इन्सपेक्टर अनिलकुमार शाहले लागू औषध दुव्र्यसनी, भीम दल गण सल्लेरी ब्यारेकका मेजर चन्द्र प्रकाश उप्रेतीले माइन विष्फोटनको विषयमा सहजीकरण गरेका थिए ।
त्यस्तै सोही कार्यक्रमको अवसरमा हरेक विद्यालयमा ७ प्रकारका विपद्का सामाग्री वितरण गरिएको थियो । वितरण गरिएको सामाग्रीहरुमा चाइनिज कम्बल ६ थान, प्लाष्टिक त्रिपाल ६ थान, प्लाष्टिक वाल्टिन २ थान, फायर स्ट्रेड गुहसुर २ थान, प्राथमिक उपचार वासन १ सेट, थर्मलगन १ थान, अक्सिमिटर १ गरि ७ प्रकारका सामाग्री रहेका छन् ।
